«ARDOS-Júrek» múgedekter birlestigi» ZTB múmkindigi shekteýli adamdarǵa arnalǵan «Ten Qogam» mobıldi qosymshasyn tanystyrdy. Qosymsha Qazaqstannyń barlyq óńirlerindegi múgedektigi bar adamdar úshin quqyqtar, jeńildikter, oqytý, jumyspen qamtý jáne basqa da kóptegen máseleler týraly ózekti júıelengen naqty aqparatqa qoljetimdilikti qamtamasyz etedi. Jobany «Shevron» kompanııasymen seriktestikte Ortalyq Azııanyń Eýrazııa Qory (OAEQ) ázirlegen «Qolda 3.0» jedel kómek baǵdarlamasy aıasynda júzege asyrýda. Jýyrda M.Qozybaev atyndaǵy Soltústik Qazaqstan ýnıversıtetinde «Ten Qogam» mobıldi qosymshasynyń tanystyrylymy ótti. Búgingi tańda qosymshany Play Market-ten júktep alýǵa bolady.
Soltústik Qazaqstan oblysynda 26 000-nan astam múgedektigi bar adam turady. Tehnologııalardyń qaryshtap damýyna qaramastan, osy adamdar úshin qajetti aqparatty qamtyǵan sapaly mobıldi qosymshalar men saıttar áli de joq. Joba komandasy múgedektigi bar adamdardyń barlyq sanattaryna arnalǵan qazaq jáne orys tilderinde «Ten Qogam» mobıldi qosymshasyn ázirledi.
«ARDOS-Júrek» múgedekter birlestiginiń dırektory Aqjan Kárim bylaı dep atap ótti:
«Bul qosymsha múgedektigi bar adamdarǵa, sondaı-aq olardyń otbasy múshelerine zańdardaǵy sońǵy ózgerister men mádenıet obektileriniń qoljetimdiligi týraly habardar bolýǵa múmkindik beredi. Qosymsha arqyly ınvataksı qyzmetterin paıdalaný, azyq-túlik, dári-dármek jetkizýge tapsyrys berý múmkindigi paıda boldy».
Qosymshada kelesi bloktar boıynsha ózekti aqparat bar: quqyqtar, jeńildikter, oqytý, jumyspen qamtý, memlekettik organdarmen ózara is-qımyl jáne t. b. Barlyq aqparat kez-kelgen qurylǵydan kirýge yńǵaıly bolý úshin https://tenqogam.kz/ saıtynda qaıtalanady. Soltústik Qazaqstan oblysynyń turǵyndary úshin ózekti aqparatty qamtıtyn «Qyzmetter jáne servıs» qosymsha betin barlyq oblystarǵa keńeıtý josparlanýda.
Mobıldi qosymshany ázirleýge halyqty jumyspen qamtý ortalyǵy, jumyspen qamtýdy úılestirý jáne áleýmettik baǵdarlamalar basqarmasy, áleýmettik qyzmet kórsetý ortalyǵy, «Nur Otan» partııasy jáne qoǵamdyq uıymdar ókilderinen turatyn fokýs-toptar qatysty. Fokýs-toptardyń qatysýshylary qosymshanyń ózektiligin atap ótti jáne óz taraptarynan qosymshanyń mazmuny men fýnkıonaly boıynsha usynystarymen bólisti. Mysaly, olar qoljetimdilik elementterin kórsete otyryp, paıdalanýshylardy mádenı-demalys is-sharalary týraly habardar etý úshin qosymshany paıdalanýdy usyndy. Sondaı-aq, qosymshaǵa «Sport» qosymsha betin qosý usynyldy. Otyrys qorytyndysy boıynsha barlyq qatysýshylar «Ten Qogam» mobıldi qosymshasyn jetildirýge jáne ilgeriletýge kómek kórsetýge kelisti.
"Adyrna" ulttyq portaly
