abai.kz redaksiiasyna memlekettık qairatker İmanǧali Tasmaǧambetovtıŋ qazaqstandyqtarǧa arnalǧan ündeuı kelıp tüstı, dep habarlaidy «Adyrna» tılşısı.
«Aǧaiyndar, bauyrlar, azamattar! Osynau qaŋtardyŋ qaharly künderı elımızde, onyŋ ışınde ainalaiyn aq Almatymyzdyŋ basyna tüsken qaraly künderı oryn alǧan dürbeleŋde Özderıŋızge ün qatudy azamattyq paryzym dep bılemın. Ökınışke orai, osy künderı qaza tapqan azamattar az emes. Olardyŋ otbasylary men jaqyndaryna qaiǧyryp köŋıl aitamyn. İmandary joldas bolsyn. Söz joq, bızdıŋ el ejelden eŋbek pen erlıktı, jıger men erıktı tu etken tektı halyq. «Bas kespek bar bolsa da, tıl kespek joq» dep öz tılegın tılımen, sözımen jetkızgen jūrt. Sondyqtan da būl künderı kei öŋırlerde bastalǧan şeruler beibıt sipatta, ädılettı talappen boldy. Dese de, arnaiy daiyndalǧan arandatuşylar men sodyrlar jaǧdaidy paidalanyp kettı.Nätijesınde, «Täuelsızdıktıŋ tal besıgı» sanalatyn alyp şahardy qantögıstıŋ alaŋyna ainaldyrdy. Būl jai ǧana qylmys emes. Būl jauyzdyq! Otanǧa, Täuelsızdıkke jasalǧan opasyzdyq! Qarapaiym azamattarymyzǧa jasalǧan qatıgezdık! Mūndaida el bolaşaǧy üşın jauapkerşılıktıŋ auyr jügı Memleket basşysynyŋ moinynda. Al däl qazır Prezident är azamattyŋ, är otbasynyŋ, tūtas qoǧam qauıpsızdıgınıŋ jalǧyz kepılı! Osy oraida, men barşa qazaqstandyqtardy Memleket basşysy Qasym-Jomart Toqaevqa qoldau körsetuge şaqyramyn! Bız qai jerde tuyp, qai öŋırde jürsek te bır atanyŋ balasymyz. Qarǧa tamyr qazaqpyz! Men küştı de quatty, äsem de äleuettı memlekettıŋ erteŋıne senemın! Aman bolaiyq! El bırlıgı men berekesın saqtaiyq, aǧaiyn!»– dedı ol.
«Adyrna» ūlttyq portaly
