قر پرەزيدەنتىنىڭ ءباسپاسوز حاتشىسى رۋسلان جەلدىباي پرەزيدەنتتىڭ باستاماسىمەن بالالار جىلىنىڭ اياسىندا «ۇلتتىق قور – بالالارعا» اتتى جاڭا باعدارلاما ىسكە قوسىلاتىنىن ايتتى، دەپ حابارلايدى «ادىرنا» ءتىلشىسى.
«2024 جىلدان باستاپ ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزى بالالار 18 جاسقا تولعانعا دەيىن ولاردىڭ ارناۋلى جيناقتاۋشى ەسەپشوتىنا اۋدارىلادى.
جيناقتالعان قارجى بالالار كامەلەت جاسىنا تولعاننان كەيىن ولاردىڭ باسپانا نەمەسە ءبىلىم الۋىنا جۇمسالادى.
ۇكىمەت پەن ۇلتتىق بانكتىڭ ەسەبى بويىنشا ەلىمىزدە جىل سايىن 400 مىڭ ءسابي دۇنيەگە كەلەدى. ءار بالا 18 جاسقا تولعانشا ولاردىڭ ەسەپشوتىندا كەمى 3 مىڭ اقش دوللارىنا تەڭ قاراجات جينالادى»،—دەدى ول.
