بۇگىن، 15 ماۋسىمدا شىعىس قازاقستان وبلىسىنىڭ قازىرگى اكىمى دانيال احمەتوۆتىڭ وكىلەتتىك مەرزىمى اياقتالادى. ول بۇگىن 69 جاسقا تولدى. ال 16 ماۋسىمدا شىعىس قازاقستان وبلىسى اكىمىنىڭ كانديداتۋراسىن بەكىتۋ ءۇشىن وبلىستىق ءماسليحات دەپۋتاتتارىنىڭ جيىنى وتەدى، دەپ حابارلايدى “ادىرنا” ۇلتتىق پورتالى.
دانيال احمەتوۆ بۇل قىزمەتتى 2014 جىلدان بەرى اتقارىپ كەلەدى.
«وبلىس اۋماعىندا ورنالاسقان ءماسليحاتتار نەمەسە رەسپۋبليكالىق ماڭىزى بار قالالار ءماسليحاتتارى دەپۋتاتتارىنىڭ كەلىسىم بەرۋ قاعيدالارىن بەكىتۋ تۋرالى» قازاقستان رەسپۋبليكاسى پرەزيدەنتىنىڭ 2022 جىلعى 8 ماۋسىمداعى № 912 جارلىعىنا سايكەس جانە وبلىس، رەسپۋبليكالىق ماڭىزى بار قالا جانە استانا اكىمىن تاعايىنداۋ جونىندەگى» شىعىس قازاقستان وبلىسىنىڭ اۋماعىندا ورنالاسقان ءماسليحاتتار دەپۋتاتتارىنىڭ جينالىسى شىعىس قازاقستان وبلىسىنىڭ اكىمىن تاعايىنداۋعا كەلىسىم بەرەدى، 2023 جىلعى 16 ماۋسىمدا ساعات 10:30-دا وسكەمەن قالاسى، قازاقستان كوشەسى، 55 (س. امانجولوۆ اتىنداعى شق 5 كورپۋسى) مەكەنجايىندا وتەدى، - دەلىنگەن حابارلامادا.
سونىمەن قاتار، بۇگىن دانيال احمەتوۆ 69 جاسقا تولىپ وتىر.
«ەندى باسقا جۇمىسقا ەمەس، زەينەتكە كەتكەنى دۇرىس»
بەلگىلى رەجيسسەر، وپپوزيتسيا بەلسەندىسى ەركىن راقىشەۆ اكىمنىڭ تۋعان كۇنىن قۇتتىقتاي وتىرا، ونى زەينەتكە جىبەرۋ كەرەك دەدى.
دانيال احمەتوۆ اعامىزدى تۋعان كۇنىمەن قۇتتىقتايمىز. وكىلەتتى مەرزىمى دە ءبىتىپ جاتىر ەكەن. ەندى ول كىسى باسقا جۇمىسقا ەمەس، زەينەتكە كەتكەنى دۇرىس. ول وزىنە پايدالى بولادى. نەگە؟
قازىر زاڭسىز شەتەلگە شىققان دۇنيە-مۇلىكتەردى قايتارۋ كەرەك دەگەن زاڭ شىعىپ جاتىر. الدىمەن، بۇل ءىرى بيزنەسمەندەرگە قاتىسى بولعانىمەن، ەكىنشى ءبىر ۇشى اكىمدەرگە دە قاتىستى. سوندىقتان احمەتوۆتىڭ دە قىلمىسقا قاتىسى بار ما ەكەنىن انىقتاۋ قاجەت. كەيىن قىلمىستى بولىپ جاتسا، دەمالماي جۇمىس ىستەگەنىنە وكىنىپ قالادى. سەبەبى، ول سانالى عۇمىرىن “مافياعا” قىزمەت ەتۋگە ارنادى. ءماجبۇرلى تۇردە نازارباەۆتىڭ تالاي زاڭسىز بۇيرىقتارىن ورىندادى، - دەدى ەركىن راقىشەۆ.
«بەردىبەك ساپارباەۆپەن تاعدىرى بىردەي»
ال قوعام بەلسەندىسى، ساياساتكەر جانۇزاق اكىم دانيال احمەتوۆتىڭ ەلگە سىڭگەن ەڭبەگى كوپ دەيدى.
بۇل كىسى تۋرالى قوعامدا كوپ اڭگىمە بولىپ ءجۇر. بىراق، ول تاجىريبەلى ادام. سودان كەيىن اۆتوريتارلىق جۇيەنىڭ جانە شارۋاشىلىقتىڭ ادامى.
بۇل ريددەردى التاي دەپ وزگەرتتى. ال شارۋاشىلىق جاعىنا بەيىم. ۇكىمەتكە دە كوپ جۇمىس ىستەدى. 90-جىلدارى مەن اكىم بولعان كەزىمدە، ول پرەمەردىڭ ءبىرىنشى ورىنباسارى بولدى. سول جىلدارى “شەگىرتكەنىڭ قۇتىرعان” قيىن كەزدەرى بولدى. ول كەزدە دانيال احمەتوۆ ناتيجەلى جۇمىس ىستەدى. جاڭا ءوندىرىس اشۋدا كوپ كومەگى ءتيدى. ەكونوميكادان جاقسى تۇسىنەدى. بىراق، زامانىنان قالىپ قويدى. دەگەنمەن، وتباسى ءبىرىنشى پرەزيدەنتتىڭ وتباسىسى سياقتى كورىنگەن زاتتى جەكەشەلەندىرىپ، قىتايمەن بايلانىسۋدا. مۇنداي قاتەلىكتەرى دە بار.
بۇل كىسى بەردىبەك ساپارباەۆقا ۇقساس. تاعدىرى بىردەي. ەكەۋى دە ءومىر بويى جۇمىسپەن كەلە جاتىر”،- دەدى جانۇزاق اكىم.
