Астанада жолаушылары бар автобус пойызға соқтығысты

2316
Adyrna.kz Telegram
Фото: видеодан алынды
Фото: видеодан алынды

Астанада жолаушылары бар автобус пойызға соқтығысты. Автобус жол ережесін бұзған. Бұл туралы City Transportation Systems ЖШС баспасөз қызметі мәлімдеді, деп хабарлайды “Адырна” ұлттық порталы. 

Ақпаратқа сүйенсек, оқыс оқиға 31 тамыз күні сағат 21:40-та Тайбурыл көшесінен Үшқоңыр көшесіне дейінгі бағытта болған.

№30 маршруты бойынша жүретін автобустың жүргізушісі жол қозғалысы ережесін бұзып, теміржол өткелінде жол белгілері мен бағдаршамды елемей, тепловозға соқтығысқан. Оқиға орнына келген полиция қызметкері маршруттық транспорт құралының жүргізушісіне қарсы әкімшілік хаттама толтырды, – деп хабарлады компания өкілдері.

Сондай-ақ, Astanovka Telegram арнасында автобус және пойыздың қатысуымен болған жол апатының видеосы жарияланған. Видеоның сипаттамасында №30 маршруты бойынша жүретін автобустың жүргізушісі жол ережесін өрескел бұзып, тепловозбен соқтығысқаны туралы жазылған.

Ал CTS баспасөз қызметі жүргізушінің жолаушылар көлігін басқару бойынша 30 жылдық тәжірибесі барын атап өтті. Ол №1 автобус паркінде 10 жылдан бері жұмыс істеп келеді. Рейс басталмас бұрын жүргізуші медициналық тексеруден өткен. Сондай-ақ компания жол апаты кезінде ешбір жолаушы зардап шекпегенін айтты. Жүргізуші жұмыстан шеттетіліп, CTS даярлау орталығына қайта дайындықтан өтуге жіберілді.

Астана қалалық полиция департаментінің баспасөз қызметі Iveko автобусының 53 жастағы жүргізушісі Әкімшілік құқық бұзушылық туралы кодекстің 610-бабының 1-бөлігі бойынша әкімшілік жауапкершілікке тартылғанын айтты.

Аталған іс бойынша барлық материал Астана қаласының Әкімшілік құқық бұзушылық істері жөніндегі мамандандырылған ауданаралық сотына жолданды.

Пікірлер