Қырғызстанда Жамбыл облысының тұрғынын өлтірді деген күдікке ілінген Қазақстан азаматы ұсталды. Бұл туралы Қырғызстанның ішкі істер министрлігі жариялады, деп хабарлайды “Адырна” ұлттық порталы.
Мәлімет бойынша, қашқын халықаралық іздеуде болған.
2022 жылдың 25 қыркүйегінде Жамбыл облысы Шу аудандық ауруханасына 23, 25 және 26 жастағы төрт жігіт оқ жарақатымен түскен. Кейін олардың бірі жансақтау бөлімінде қайтыс болды. "Адам өлтіру" бабы бойынша қылмыстық іс қозғалды. Көп ұзамай күдіктілер ұсталды, бірақ біреуі қашып үлгеріп, оған халықаралық іздеу жарияланды.
Белгілі болғандай, ол Қырғызстан аумағында жасырынып жүрген. Осы жылдың 21 тамызында Бішкек қаласында бет-әлпетін тану мүмкіндігі бар бейнебақылау камералары іздеуде жүрген азаматты анықтады. Оқиға орнына барған Ленин ауданы күзет бөлімінің қызметкерлері (ІІМ Күзет қызметі) сауда кешендерінің бірінің аумағында іздеуде жүрген Қазақстан азаматы екені анықталған ер адамды ұстады", - деп хабарлады Қырғызстанның ішкі істер министрлігі.
Ұсталғаннан кейін ер адам аудандық милиция басқармасына тапсырылды. Алайда сол күні кешке ол сараптамадан өтуге жеткізілген медициналық мекеменің аумағынан қашып үлгерген.
Бірақ 29 тамызда ішкі істер органдарының қызметкерлері қашқын қазақстандықтың тұрған жерін анықтады. Ол жалдамалы пәтерде жасырынып жүрген. Сол жерде оны полиция қызметкерлері Қырғызстандағы Интерпол бюросының қызметкерлерімен бірге ұстады, - деді министрліктегілер.
Айта кетсек, ұсталған азамат 2000 жылы туған Қазақстанның Жамбыл облысы Шу ауданының тұрғыны болып шықты.
