64 жасында қазақстандық журналист Базарбай Әлеуханұлы қайтыс болды, деп хабарлайды "Адырна".
Сатираның сұрмергені, жезқазғандық журналист Базарбай Әлеуханұлы қайтыс болды. Поэзия патшалығында өзіндік қолтаңбасымен ой толғап жүрген журналист өз ортасында сатирадағы сұрмергендігімен танылған еді.
Қаламы – жебе, ойы - терең болған журналист 1959 жылы 24 қаңтарда туған.
Жоғары білімді азамат 1995 жылы Жезқазған кен-техникалық институтында құрылысшы-инженер мамандығын алса, Орта-Азия университетінде 2001 жылы заңгер мамандығын тәмамдаған. Журналистік білімді 2006 жылы алған.
Қазақстан Журналистер Одағының мүшесі болған Базарбай Әлеуханұлы «Жезқазған қалалық «Дидар» телерадиохабар дирекциясы» коммуналдық мемлекеттік кәсіпорнының директоры қызметін атқарды.
