Ұлттық қауіпсіздік комитеті прокуратура мен полиция қызметкерлерінің бірігуімен Маңғыстау облысында бопсалау, денсаулыққа ауыр зиян келтіру және заңсыз қару сақтау күдіктері бойынша бір топ адамның әрекетін тоқтатты, - деп хабарлайды "Адырна" порталы.
Қыркүйектің 18-і күні өткен операция барысында қылмыстық топтың жетекшісі мен үш қатысушысы ұсталып, атыс қаруы мен оқ-дәрі тәркіленді.
"Қолда бар мәліметтерге сәйкес, олар физикалық зиян келтіреміз деп қорқытып, аймақтық және халықаралық бағыттар бойынша жеке тасымалдаумен айналысатын кәсіпкерлерден ақша талап еткен. Шабуылдағандардың аты-жөні анықталды, оның ішінде шекара қызметінің кезекші әскери қызметкері де бар", - деді Ұлттық қауіпсіздік комитеті.
Соттың санкциясымен ұсталған тұлғаларға қамауға алу түріндегі бұлтартпау шарасы қолданылды. Жедел-іздестіру шаралары жалғасуда.