Қазақстандық дзюдошы Әбиба Әбужақынова Ханчжоуда өтіп жатқан ХІХ жазғы Азия ойындарының финалына шықты, деп хабарлайды «Адырна» тілшісі.
Отандасымыз 48 келіге дейінгі салмақ дәрежесінде өнер көрсетеді.
Жартылай финалда қазақстандық спортшы Оңтүстік кореялық Ли Хек Енгті жеңді. Ал финалда Әбиба Әбужақынова жапондық Натсуми Тсунодомен кездеседі.
Ал 60 келіде сынға түскен дзюдошы Мағжан Шамшадин жартылай финалда Оңтүстік Корея балуаны Харим Лиге жол берді. Енді ол қола жүлде үшін Мехрзод Суфиевпен (Тәжікстан) белдеседі.
Сонымен қатар сағат 16:00-де тағы бір отандасымыз Ғалия Тынбаева қола медаль үшін таласады. 52 келідегі спортшы жұбаныш белдесуінде моңғол балуанын жеңіп, қола медальға таласу құқығын алған еді.
