اۋلانعان كيىكتەردىڭ ءمۇيىزى قىتايعا ساتىلاتىن بولدى. اقبوكەندەردىڭ پوپۋلياتسياسىن اۋلاۋ مەن اتۋ ارقىلى رەتتەپ جاتقان ەكولوگيا مينيسترلىگى بۇعان دەيىن ەتى مەن تەرىسىن ساتۋدى ەل اۋماعىندا باستاعان. ەندى مينيستر ەرلان نىسانباەۆ ءمۇيىزىن دە كادەگە اسىرامىز دەپ وتىر، دەپ حابارلايدى «ادىرنا» ءتىلشىسى «كتك» ارناسىنا سىلتەمە جاساپ.
ازىرگە ولاردى ەكسپورتقا شىعارۋعا سيتەس حالىقارالىق كەلىسىمى كەدەرگى كەلتىرىپ تۇر. وعان سايكەس، كەي جانۋاردىڭ، ونىڭ ىشىندە اقبوكەننىڭ دەريۆاتتارىن ساتۋعا بولمايدى. جاۋاپتى ۆەدومستۆو وكىلدەرى ماسەلەنى شەشۇ ءۇشىن شۆەيتسارياعا شۇعىل اتتانىپتى. كەلىسسوزدەر ءوز ناتيجەسىن بەرسە، ءمۇيىزدى ەكسپورتتاۋ 2025 جىلى باستالماقشى.
ايتا كەتەيىك، وسى اپتادا عانا اتالمىش سالانىڭ باسى-قاسىندا جۇرگەن جاۋاپتى اتقامىنەرلەر كيىكتىڭ ەتى دە، ءمۇيىزى دە شەتەل اسپايدى دەگەن بولاتىن. الايدا مينيسترلىك شەشىمىنىڭ بۇلاي تەز وزگەرۋىنە اقبوكەن مۇيىزىنە شەتەلدىكتەردىڭ شامادان تىس سۇرانىسى سەبەپ بولعان. اسىرەسە شىعىس مەديتسيناسىندا كيەلى جانۋاردىڭ ءمۇيىزى تاپتىرماس دارىلىك پرەپارات رەتىندە قولدانىلادى. بىراق ازىرگە باعاسى بەلگىلەنبەپتى.
«اقبوكەندەردىڭ ءمۇيىزى شىعىس ەلدەرىندە فارماتسەۆتيكا سالاسىندا كەڭىنەن پايدالانىلادى. نەگىزىنەن قىتايدا سۇرانىسقا يە ەكەنىن بىلەمىز عوي. تەك ولاردى ەكسپورتتاۋعا مۇمكىندىگىمىز جوق بولىپ وتىر. سەبەبى CITES حالىقارالىق ۇيىمى جانۋارلاردىڭ جەكەلەگەن ءتۇرى، سونىڭ ىشىندە كيىكتەردىڭ بولىكتەرى مەن دەريۆاتتارىن ەكسپورتتاۋعا تىيىم سالعان. قازىر تىيىمدى الىپ تاستاۋ بويىنشا كەلىسسوزدەر جۇرگىزىپ جاتىرمىز»،—دەدى ەكولوگيا جانە تابيعي رەسۋرستار ءمينيسترى ەرلان نىسانباەۆ.
ەسكە سالايىق، ەلىمىزدە كيىك اتۋدىڭ مەرزىمى بەلگىلەنگەنىن جازعان ەدىك.
