ونوماستيكالىق كوميسسيانىڭ وڭ شەشىمىنەن سوڭ اسكەري بولىمدە قورعانىس مينيسترلىگىنىڭ باسشىلىعى مەن جەتىسۋ وبلىسى اكىمدىگىنىڭ، اۋە قورعانىسى كۇشتەرى قولباسشىلىعىنىڭ، اسكەري قىزمەتشىلەر مەن قارۋلى كۇشتەر ارداگەرلەرىنىڭ قاتىسۋىمەن سالتاناتتى ءىس-شارا ءوتتى. بۇل تۋرالى قورعانىس مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
اسكەري ءبولىمنىڭ اۋماعىندا سەرگەي لۋگانسكيدىڭ ءبيۋستى اشىلدى. ونىڭ اشىلۋ سالتاناتىنا قورعانىس ءمينيسترى گەنەرال-پولكوۆنيك رۋسلان جاقسىلىقوۆ، وبلىس اكىمى بەيبىت يساباەۆ، كەڭەس وداعىنىڭ باتىرى، حالىق قاھارمانى اۆياتسيا گەنەرال-مايورى توقتار اۋباكىروۆ جانە حالىق قاھارمانى اۆياتسيا گەنەرال-مايورى ايدىن ايىمبەتوۆ جانە پارلامەنت دەپۋتاتتارى قاتىستى. ولار باتىردىڭ بيۋستىنە گۇل شوقتارىن قويىپ، ءبىر مينۋت ۇنسىزدىكپەن ەسكە الدى.
"ۇلى وتان سوعىسى جىلدارىندا بەس جۇزدەن استام قازاقستاندىق كەڭەس وداعىنىڭ باتىرى اتاعىنا يە بولدى. ونىڭ ىشىندە لەونيد بەدا، تالعات بيگەلدينوۆ، سەرگەي لۋگانسكي جانە يۆان پاۆلوۆ باتىر اتاعىن ەكى مارتە الدى. قارۋلى كۇشتەردىڭ جەكە قۇرامى مەملەكەت باسشىسىنىڭ ەرجۇرەك ۇشقىشتىڭ ەسىمىن ماڭگىلىك ەستە قالدىرۋ تۋرالى ۇسىنىسىن قۋانا قابىلدادى. بۇگىن ءبىز تالدىقورعان اۆيابازاسىنا سەرگەي لۋگانسكيدىڭ ەسىمىن بەرىپ وتىرمىز", - دەدى جاقسىلىقوۆ.
قورعانىس ۆەدومستۆوسىنىڭ باسشىسى پرەزيدەنت ارميانىڭ جوعارى جاۋىنگەرلىك دايىندىعىن قولداۋ جانە مەملەكەتتىڭ قورعانىس قابىلەتىن قامتاماسىز ەتۋ ىسىندەگى جەتىستىكتەرىنە جوعارى باعا بەرگەنىن اتاپ ءوتتى. قورعانىس ءمينيسترى ءبولىمنىڭ جەكە قۇرامى باتىردىڭ ەسىمىن لايىقتى الىپ جۇرەتىنىنە سەنىم ءبىلدىردى.
ءىس-شارالار اياسىندا س. لۋگانسكيدىڭ ءومىرى مەن ەرلىگى تۋرالى فيلم كورسەتىلىپ، فوتوسۋرەت جانە كىتاپ كورمەلەرى ۇيىمداستىرىلدى. قارۋلى كۇشتەر شىعارماشىلىق ۇجىمدارىنىڭ كۇشىمەن كونتسەرتتىك باعدارلاما دايىندالدى.
لۋگانسكي – اتى اڭىزعا اينالعان قازاقستاندىق ۇشقىش. II دۇنيەجۇزىلىك سوعىس كەزىندە 270-ءشى جويعىش اۆياتسيا پولكىنىڭ ەسكادريليا كومانديرى بولعان. وعان دەيىن 1939-1940 جىلدارداعى كەڭەس-فين سوعىسىنا دا قاتىستى.
تانىمال ۇشقىش 390 رەت اسپانعا كوتەرىلىپ، جاۋدىڭ 37 ۇشاعىن اتىپ تۇسىرگەن. ەسكادريليا باسشىسى رەتىندە كوپتەگەن ءىرى اۋە شايقاستارىنا قاتىستى. ماسەلەن، دنەپردى الار كەزدە كەڭەس اسكەرىنە اسپاننان قولداۋ جاسادى.
