Onomastıkalyq komıssııanyń oń sheshiminen soń áskerı bólimde qorǵanys mınıstrliginiń basshylyǵy men Jetisý oblysy ákimdiginiń, Áýe qorǵanysy kúshteri qolbasshylyǵynyń, áskerı qyzmetshiler men qarýly kúshter ardagerleriniń qatysýymen saltanatty is-shara ótti. Bul týraly qorǵanys mınıstrligi málimdedi, dep habarlaıdy “Adyrna” ulttyq portaly.
Áskerı bólimniń aýmaǵynda Sergeı Lýganskııdiń bıýsti ashyldy. Onyń ashylý saltanatyna qorǵanys mınıstri general-polkovnık Rýslan Jaqsylyqov, oblys ákimi Beıbit Isabaev, Keńes Odaǵynyń Batyry, Halyq qaharmany avıaııa general-maıory Toqtar Áýbákirov jáne Halyq qaharmany avıaııa general-maıory Aıdyn Aıymbetov jáne parlament depýtattary qatysty. Olar batyrdyń bıýstine gúl shoqtaryn qoıyp, bir mınýt únsizdikpen eske aldy.
"Uly Otan soǵysy jyldarynda bes júzden astam qazaqstandyq Keńes Odaǵynyń Batyry ataǵyna ıe boldy. Onyń ishinde Leonıd Beda, Talǵat Bıgeldınov, Sergeı Lýganskıı jáne Ivan Pavlov Batyr ataǵyn eki márte aldy. Qarýly kúshterdiń jeke quramy Memleket basshysynyń erjúrek ushqyshtyń esimin máńgilik este qaldyrý týraly usynysyn qýana qabyldady. Búgin biz Taldyqorǵan avıabazasyna Sergeı Lýganskııdiń esimin berip otyrmyz", - dedi Jaqsylyqov.
Qorǵanys vedomstvosynyń basshysy prezıdent armııanyń joǵary jaýyngerlik daıyndyǵyn qoldaý jáne memlekettiń qorǵanys qabiletin qamtamasyz etý isindegi jetistikterine joǵary baǵa bergenin atap ótti. Qorǵanys mınıstri bólimniń jeke quramy batyrdyń esimin laıyqty alyp júretinine senim bildirdi.
Is-sharalar aıasynda S. Lýganskııdiń ómiri men erligi týraly fılm kórsetilip, fotosýret jáne kitap kórmeleri uıymdastyryldy. Qarýly kúshter shyǵarmashylyq ujymdarynyń kúshimen konerttik baǵdarlama daıyndaldy.
Lýganskıı – aty ańyzǵa aınalǵan qazaqstandyq ushqysh. II dúnıejúzilik soǵys kezinde 270-shi joıǵysh avıaııa polkiniń eskadrılıa komandıri bolǵan. Oǵan deıin 1939-1940 jyldardaǵy keńes-fın soǵysyna da qatysty.
Tanymal ushqysh 390 ret aspanǵa kóterilip, jaýdyń 37 ushaǵyn atyp túsirgen. Eskadrılıa basshysy retinde kóptegen iri áýe shaıqastaryna qatysty. Máselen, Dneprdi alar kezde keńes áskerine aspannan qoldaý jasady.
