Jetısu oblysynda Memleket basşysy bastamaşylyq etken «Taza Qazaqstan» respublikalyq ekologiialyq baǧdarlamasy men «Zaŋ men tärtıp» qaǧidatyn ıske asyru maqsatynda reidtık-profilaktikalyq ıs-şaralar tūraqty türde jürgızılude.
Oblys äkımı orynbasarynyŋ jetekşılıgımen 2026 jylǧy 17 mausymnan bastap oblystyq, audandyq jäne qalalyq vedomstvoaralyq mobildı top jūmys ısteude. Onyŋ qūramyna prokuratura, polisiia, ekologiia, tötenşe jaǧdailar, sanitariialyq-epidemiologiialyq baqylau departamentı, kölıktık baqylau inspeksiiasy, oblystyq basqarmalar, jastar jäne volonterlık ūiymdar, sondai-aq būqaralyq aqparat qūraldarynyŋ ökılderı engızılgen.
Bügıngı künge deiın oblys aumaǧynda 139 reidtık ıs-şara ötkızılıp, 89 qūqyq būzuşylyq anyqtaldy. Reidterdıŋ qorytyndysy boiynşa būqaralyq aqparat qūraldarynda 156 jariialanym jaryq kördı.
27–28 şılde künderı Taldyqorǧan qalasy men Eskeldı audanynda mobildı toptardyŋ qatysuymen kezektı reidter ūiymdastyrylyp, anyqtalǧan qūqyq būzuşylyqtar boiynşa zaŋnama talaptaryna säikes tiıstı äkımşılık şaralar qabyldandy.
27 şıldede Taldyqorǧan qalasynda Qaratal jäne Balyqty özenderınıŋ boiynda «Şomyluǧa tyiym salynady» belgılerı ornatylǧan aumaqtarda qala äkımınıŋ orynbasary Quanyş Seitımbetovtıŋ jetekşılıgımen profilaktikalyq reid ötkızıldı. Nätijesınde tyiym salynǧan jerde suǧa şomylǧan 2 qūqyq būzuşylyq faktısı anyqtalyp, Qazaqstan Respublikasy Äkımşılık qūqyq būzuşylyq turaly kodeksınıŋ 412-baby boiynşa ekı azamatqa ärqaisysyna 3,5 AEK mölşerınde äkımşılık aiyppūl salyndy. Jalpy aiyppūl somasy 55 062 teŋgenı (7 AEK) qūrady.
Reid barysynda demaluşylarǧa sudaǧy qauıpsızdık talaptary tüsındırılıp, belgılengen erejelerdı saqtaudyŋ maŋyzdylyǧy jönınde profilaktikalyq jūmystar jürgızıldı.
28 şıldede Taldyqorǧan qalasynda jürgızılgen reid kezınde Qaratal özenınıŋ jaǧalauyndaǧy ortaq paidalanylatyn aumaqqa auyr jük kölıgımen tūrmystyq qatty qaldyqtardy zaŋsyz tögu deregı anyqtaldy. Qūqyq būzuşyǧa qatysty Qazaqstan Respublikasynyŋ Äkımşılık qūqyq būzuşylyq turaly kodeksıne jäne abattandyru qaǧidalaryna säikes tiıstı äkımşılık şaralar qabyldandy.
Sol künı qalanyŋ sanitariialyq jaǧdaiyna jürgızılgen monitoring barysynda 6 qūqyq būzuşylyq anyqtaldy. Onyŋ ışınde Qazaqstan Respublikasy Äkımşılık qūqyq būzuşylyq turaly kodeksınıŋ 505-baby boiynşa 3 azamatqa äkımşılık aiyppūl salynyp, 3 azamatqa eskertu berıldı.
Eskeldı audanynda äkım orynbasary Janar Baiūzaqova jetekşılıgımen ötkızılgen reid qorytyndysy boiynşa 6 äkımşılık hattama räsımdeldı. Onyŋ ışınde 5 azamatqa eskertu jasalyp, 1 qūqyq būzuşyǧa Äkımşılık qūqyq būzuşylyq turaly kodekstıŋ 505-babynyŋ 1-bölıgıne säikes 20 AEK (86 500 teŋge) mölşerınde äkımşılık aiyppūl salyndy.
Mūndai reidtık-profilaktikalyq ıs-şaralar qoǧamdyq tärtıptı nyǧaituǧa, qorşaǧan ortany qorǧauǧa, tūrǧyndardyŋ ekologiialyq mädenietın arttyruǧa jäne azamattardyŋ qauıpsız ärı jaily ortada ömır süruıne jaǧdai jasau maqsatynda tūraqty türde jalǧasatyn bolady.
