Ташкент облысы Алмалық қаласының 28 жастағы тұрғыны Өзбекстан президенті Шавкат Мирзиеевті балағаттады деп айыпталды. Бұл туралы Газета.uz жазды, деп хабарлайды «Адырна» тілшісі.
Үкімді 8 сәуірде Самарқанд облысының Ыстықхан аудандық қылмыстық істер жөніндегі соты шығарды.
Сотталушы — фармацевтикалық компанияның негізін қалаушы. Ол 2023 жылдың 2 мамыры мен 31 тамызы аралығында Instagram желісінде президентке тіл тигізетін пікірлер қалдырған. Ер адам кінәсін толық мойындап, жасаған әрекетіне өкінетінін жеткізді.
Сот Алмалық тұрғынын Өзбекстан Қылмыстық кодексінің 158-бабының 3-бөлігі («Өзбекстан Республикасы президентін жария түрде қорлау немесе жала жабу, сол сияқты баспасөз немесе өзге де бұқаралық ақпарат құралдарын, телекоммуникация желілерін немесе интернетті пайдалану») бойынша кінәлі деп тапты. Ол 2 жыл 6 ай түзеу жұмыстары түріндегі жазаға тартылды. Сондай-ақ ай сайын жалақысының 20 пайызы өндіріп алынатын болады.
Еске салайық, бұған дейін жыл басынан бері Өзбекстан президентін «балағаттады» деген 10 адамның сотталғанын жазған едік.