Қазақстан футбол федерациясы Әли Әлиевті ұлттық құраманың бас бапкері етіп тағайындады, деп хабарлайды "Адырна" ұлттық порталы Tengri Sport сілтеп.
Осыған дейін ол бас бапкердің міндетін уақытша атқарып келген болатын.
Әлиев Tengri Sport тілшісімен әңгімесінде бұл ақпаратты растады және кеше ғана Қазақстан футбол федерациясымен ресми түрде келісімшартқа қол қойғанын айтты. Алайда келісімшарттың егжей-тегжейі құпия болып қалуда, себебі бапкер құпиялылық туралы құжатқа қол қойған.
"Иә, мен ресми түрде Қазақстан құрамасының бас бапкерімін. Келісімшарт туралы мәлімет бере алмаймын. Құпиялылық туралы құжатқа да қол қойдым. Кеше қол қойып, ресми түрде тіркелдім", – деді Алиев.
Айта кетейік, ол бұл қызметке 2024 жылдың 31 қаңтарында уақытша тағайындалған болатын. Ол ресейлік маман Станислав Черчесовтың орнына келген еді. Черчесов кезінде Қазақстан құрамасы алты ойын қатарынан гол соқпаған, бұл ел тарихындағы ең сәтсіз көрсеткіштердің бірі ретінде тіркелген.
Әли Әлиев жаттықтыруымен Қазақстан құрамасы 2026 жылғы әлем чемпионатына іріктеу аясында екі матч өткізді. 23 наурыз күні Уэльс астанасы Кардиффтегі "Кардифф Сити" стадионында өткен ойында Қазақстан құрамасы 3:1 есебімен жеңіліп қалды. Ал 26 наурыз түнінде Лихтенштейнге қарсы ойында ұлттық құрама 0:2 есебімен жеңіске жетіп, ұзақ үзілістен кейін алғаш рет іріктеу кезеңінде жеңіс тойын тойлады.
Бұл – Қазақстан құрамасының әлем чемпионатының іріктеу кезеңіндегі соңғы 11 жылдан астам уақыт ішіндегі алғашқы жеңісі. Бұған дейінгі жеңіс 2013 жылдың 6 қыркүйегінде Фарер аралдарына қарсы өткен матчта (2:1) тіркелген.
