Qazaqstan futbol federasiiasy Äli Älievtı ūlttyq qūramanyŋ bas bapkerı etıp taǧaiyndady, dep habarlaidy "Adyrna" ūlttyq portaly Tengri Sport sıltep.
Osyǧan deiın ol bas bapkerdıŋ mındetın uaqytşa atqaryp kelgen bolatyn.
Äliev Tengri Sport tılşısımen äŋgımesınde būl aqparatty rastady jäne keşe ǧana Qazaqstan futbol federasiiasymen resmi türde kelısımşartqa qol qoiǧanyn aitty. Alaida kelısımşarttyŋ egjei-tegjeiı qūpiia bolyp qaluda, sebebı bapker qūpiialylyq turaly qūjatqa qol qoiǧan.
"İä, men resmi türde Qazaqstan qūramasynyŋ bas bapkerımın. Kelısımşart turaly mälımet bere almaimyn. Qūpiialylyq turaly qūjatqa da qol qoidym. Keşe qol qoiyp, resmi türde tırkeldım", – dedı Aliev.
Aita keteiık, ol būl qyzmetke 2024 jyldyŋ 31 qaŋtarynda uaqytşa taǧaiyndalǧan bolatyn. Ol reseilık maman Stanislav Cherchesovtyŋ ornyna kelgen edı. Cherchesov kezınde Qazaqstan qūramasy alty oiyn qatarynan gol soqpaǧan, būl el tarihyndaǧy eŋ sätsız körsetkışterdıŋ bırı retınde tırkelgen.
Äli Äliev jattyqtyruymen Qazaqstan qūramasy 2026 jylǧy älem chempionatyna ırıkteu aiasynda ekı match ötkızdı. 23 nauryz künı Uels astanasy Kardifftegı "Kardiff Siti" stadionynda ötken oiynda Qazaqstan qūramasy 3:1 esebımen jeŋılıp qaldy. Al 26 nauryz tünınde Lihtenşteinge qarsy oiynda ūlttyq qūrama 0:2 esebımen jeŋıske jetıp, ūzaq üzılısten keiın alǧaş ret ırıkteu kezeŋınde jeŋıs toiyn toilady.
Būl – Qazaqstan qūramasynyŋ älem chempionatynyŋ ırıkteu kezeŋındegı soŋǧy 11 jyldan astam uaqyt ışındegı alǧaşqy jeŋısı. Būǧan deiıngı jeŋıs 2013 jyldyŋ 6 qyrküiegınde Farer araldaryna qarsy ötken matchta (2:1) tırkelgen.
