Украина президентінің бұрынғы баспасөз хатшысы, журналист Юлия Мендельдің 9 мамырдағы Мәскеудегі әскери парад туралы Instagram желісінде екіұдай жазба жариялауы дауы тудырды, деп хабарлайды “Адырна” ұлттық порталы Stan.kz ақпарат агенттігіне сілтеп.
Мендель өзінің жазбасында парадқа Екінші дүниежүзілік соғысқа "соншалықты тарихи қатысы жоқ елдердің" сарбаздары қатысып жатқанын айтқан. Алайда соның алдында бірнеше елдің қатарына Қазақстанды да қосқан.
“Қытайдың, Вьетнамның, Қазақстанның және Екінші дүниежүзілік соғысқа тарихи тұрғыда соншалықты қатысы жоқ өзге де елдердің әскерлері Мәскеудегі парадқа қатысып жатыр. Путин үшін бұл парад енді естелік емес, бұл – автократиялық режимдер арасындағы бірліктің көрінісі”, – деп жазды ол.
Бұл пікір әлеуметтік желіде қызу талқыға түсті. Қолданушылар Юлия Мендельдің бұл мәлімдемесін тарихи сауатсыздық деп бағалап, Қазақстанның соғысқа қосқан үлесін еске салды.
“Бұл – мен кездестірген тарихи сауатсыз мәлімдемелердің бірі”, – деп жазды желі қолданушыларының бірі.
Сондай-ақ қолданушылар тарихи дерек келтіре отырып, Қарағандыдан шыққан төрт қазақ қызының танктік экипаж болғанын, олардың 1944 жылы із-түзсіз жоғалып кеткенін де еске салды.
Қазақстандықтар Юлия Мендельді тарихи фактілерді бұрмалағаны үшін сынға алды.
