وڭتۇستىك قازاقستان وبلىسى تولەبي اۋدانى، زەرتاس اۋىلىنداعى ەسكى زيراتتا جەرلەنگەن مايىتتەردىڭ قابىرى اشىلىپ، سۇيەكتەرى جارتاستا شاشىلىپ جاتىر
وڭتۇستىك قازاقستان وبلىسى تولەبي اۋدانى، زەرتاس اۋىلىنداعى ەسكى زيراتتا جەرلەنگەن مايىتتەردىڭ قابىرى اشىلىپ، سۇيەكتەرى جارتاستا شاشىلىپ جاتىر. ماڭىنداعى بۇلاق پەن وزەن سۋىنا اعىپ كەتكەندەرى دە بار. ال سۋدى پايدالاناتىن ەلدى مەكەندەر حالقىنا قاۋىپ ءتونىپ تۇر. ءدال وسىلاي دابىل قاققان اۋىل بەلسەندىسى تۇيمەباي بازاروۆ بيلىكتەن اراشا سۇرادى، دەپ حابارلادى وتىرار تەلەارناسى.
ماياتاس اۋلىنىڭ تۇرعىنى تۇيمەباي بازاروۆ بىلتىر قازان ايىندا قازا بولعان 65 جاستاعى قۇداشاسىن وسى زەرتاس اۋىلىنداعى زيراتقا جەرلەگەن. ول زيراتتا شاشىلعان سۇيەكتەردى كورگەندە شوشىپ، كوپكە دەيىن ءوز-وزىنەن كەلە الماعانىن ايتادى. ەسكى زيراتتىڭ ءبىر بولىگىن سۋ شايىپ كەتكەن. ال ول سۋدى قاريانىڭ ايتۋىنشا، توعىس، ەلتاي، قاراتاس، سايرام اۋىلدارىنىڭ تۇرعىندارى پايدالانىپ وتىر. زەرتاس اۋىلىنىڭ اكىمدىگى زيراتتاعى جاعدايدان حاباردار. قانداي دا ءبىر جۇمىس اتقارۋعا اۋدانداعى باسشىلاردىڭ قارجى بولگەنىن كۇتىپ وتىر. ال اۋىلدىقتار شارا تەز ارادا قولدانىلماسا، زيراتتى سۋ شايىپ كەتەتىنىن ايتۋدا.
«بۇل ماسەلە ءبىزدىڭ نازارىمىزدا. ول جەرگە كوكتەمدە اعاش وتىرعىزىپ، اۋداندىق تۇرعىن ءۇي-كوممۋنالدىق شارۋاشىلىعىنا حات جولداپ، بەتونداۋدى جانە سۋدىڭ ارناسىن بۇرۋدى سۇرانىپ وتىرمىز»، - دەيدى تولەبي اۋدانى زەرتاس اۋىلى اكىمىنىڭ ورىنباسارى ەرلان ساپاروۆ.
دەرەككوز: قازاقپارات.
فوتو: inform.kz.
