جاپونيا بيلىگى ەلدەگى جالعىزىلىكتى ازاماتتاردىڭ باسىنداعى قيىندىقتى شەشۋ ءۇشىن ارنايى باعدارلاما قابىلداپ، پوستيندۋستريالىق كەزەڭنەن كەيىن الەۋمەتتىك دەرت رەتىندە كورىنىس بەرگەن جالعىزدىقپەن ۇلتتىق دەڭگەيدە كۇرەسۋگە بەل بايلاپ وتىر دەپ حابارلايدى "ادىرنا" ۇلتتىق پورتالى "knife.media" سايتىنا سىلتەمە جاساپ.
بۇل باعىتتا الداعى ۋاقىتتا ەلدە تاۋلىك بويى جۇمىس ىستەيتىن كەڭەس بەرۋ جۇيەسى قۇرىلادى، بۇدان بولەك، جالعىزدىقتان جاپا شەگىپ جۇرگەن جاندار ءوزارا شۇيىركەلەسەتىن، جۇمىس تابۋعا كومەكتەسەتىن ءتۇرلى سۇحباتتاسۋ الاڭدارى اشىلادى.
كۇنشىعىس ەلىنىڭ بۇقارالىق اقپارات قۇرالدارىنىڭ دەرەگىنشە، اتالعان ارال ەلدىڭ بيلىگى جالعىزىلىكتى جاپونداردىڭ ناقتى سانىن ءبىلۋ ءۇشىن حالىق ساناعىن جۇرگىزۋدى كوزدەپ وتىر. ءتىپتى، مينيسترلەر كابينەتىندە جەكە حاتشىلىق اشىلعان.
ايتا كەتۋ كەرەك، 2021 جىلدىڭ اقپان ايىندا جاپونيادا جالعىزدىق جونىندەگى مينيسترلىك قۇرىلعان بولاتىن. اتالعان مينيسترلىك جالعىزدىقپەن كۇرەس شارالارىن جۇرگىزىپ قويماي، سونىمەن قاتار، ەلدەگى كەدەيلىكتى قاداعالاۋمەن ءارى قارت كىسىلەرگە جاردەم كورسەتۋدى ۇيلەستىرۋمەن اينالىسادى. قازىرگى ۋاقىتتا اتالمىش مينيسترلىككە ەلدەگى تۋ كورسەتكىشىن كوتەرۋ باعىتىندا جۇمىس ىستەيتىن مينيسترلىكتى باسقاراتىن سەيكو نودا ەسىمدى ازامات جەتەكشىلىك ەتەدى.
جالعىزدىقپەن كۇرەسۋگە كۇنشىعىس ەلىنىڭ بيلىگى كوپتەگەن سەبەپتەر بويىنشا بارىپ وتىر، سونىڭ ىشىندە، 2020 جىلى ءوز-وزىنە قول جۇمساعاندار قاراسى سوڭعى 11 جىلمەن سالىستىرعاندا كۇرت ءوسىپ كەتتى. تەك وتكەن جىلدىڭ وزىندە 21 مىڭداي جاپون ازاماتى سۋيتسيد جاساعان.
"ادىرنا" ۇلتتىق پورتالى
