وزبەكستاننىڭ پروكۋراتۋراسى ءۇش جاستاعى قىزىن ايۋعا لاقتىرىپ جىبەرگەن ايەلدىڭ ۇستىنەن قىلمىستىق ءىس قوزعادى. وزبەكستاندى ءدۇر سىلكىندىرگەن وقيعا 28-قاڭتار كۇنى، تاشكەنت زووباعىندا بولعان. جاس انا بەس مەترلىك بيىكتىكتەن ءۇش جاستاعى قىزىن ايۋ تۇراتىن توردىڭ ىشىنە لاقتىرىپ جىبەرگەن.
زۋزۋ اتتى كاۆكاز قوڭىر ايۋى ءۇش جاستاعى قىزدىڭ قاسىنا كەلىپ، يىسكەلەگەن. الايدا ايۋ قىزعا شابۋىل جاساماعان. زووباق قىزمەتكەرلەرى بىردەن ارەكەت ەتىپ، ايۋدى قاماپ، قىزدى الىپ شىققان. قىزعا العاشقى كومەكتى زووباق مەدبيكەسى كورسەتكەن، ارتىنشا ونى اۋرۋحاناعا اپارعان. قازىرگى تاڭدا ءۇش جاستاعى قىزدىڭ دەنساۋلىعى قالىپتى، ال ونىڭ اناسى قاماۋعا الىندى. ونىڭ كىناسى دالەلدەنسە، 25 جىلعا دەيىن باس بوستاندىعىنان ايىرىلۋى مۇمكىن.
اتالمىش وقيعا وزبەكستاننىڭ الەۋمەتتىك جەلى قولدانۋشىلارى اراسىندا قىزۋ تالقىلانىپ جاتىر. كوپشىلىك قاتىگەزدىك جاساعان اناعا كەشىرىم جوق دەيدى.
"ادىرنا" ۇلتتىق پورتالى
