Ózbekstannyń prokýratýrasy úsh jastaǵy qyzyn aıýǵa laqtyryp jibergen áıeldiń ústinen qylmystyq is qozǵady. Ózbekstandy dúr silkindirgen oqıǵa 28-qańtar kúni, Tashkent zoobaǵynda bolǵan. Jas ana bes metrlik bıiktikten úsh jastaǵy qyzyn aıý turatyn tordyń ishine laqtyryp jibergen.
Zýzý atty Kavkaz qońyr aıýy úsh jastaǵy qyzdyń qasyna kelip, ıiskelegen. Alaıda aıý qyzǵa shabýyl jasamaǵan. Zoobaq qyzmetkerleri birden áreket etip, aıýdy qamap, qyzdy alyp shyqqan. Qyzǵa alǵashqy kómekti zoobaq medbıkesi kórsetken, artynsha ony aýrýhanaǵa aparǵan. Qazirgi tańda úsh jastaǵy qyzdyń densaýlyǵy qalypty, al onyń anasy qamaýǵa alyndy. Onyń kinási dáleldense, 25 jylǵa deıin bas bostandyǵynan aıyrylýy múmkin.
Atalmysh oqıǵa Ózbekstannyń áleýmettik jeli qoldanýshylary arasynda qyzý talqylanyp jatyr. Kópshilik qatygezdik jasaǵan anaǵa keshirim joq deıdi.
"Adyrna" ulttyq portaly
