نازارباەۆ زامانىندا جۇيەنىڭ قىرىنا ىلىگىپ جاپا شەگىپ، شەتەل اسقان قازاقتار كوپ.
ەگەر توقاەۆتىڭ تۇسى راس جىلىمىق زامان بولاتىن بولسا، ەندى ولار ەلگە ورالىپ زاڭدى تۇرعىدا ەلدەگى قوعامدىق جۇمىستارعا ارالاسىپ، كەشەگى توقاەۆ ايتقان كەلەشەك جاڭا پارتيالاردى قۇرىپ نەمەسە جاڭا ۇيىمدار قۇرامىنا كىرىپ زاڭ اياسىندا ءوز بەلسەندىلىكتەرىن جالعاستىرۋى كەرەك. ولار دا قازاقستان ازاماتتارى، بۇل ولاردىڭ قۇقى.
Ardak Ashim, بوتاگوز يسا، قۋات احمەتوۆ، ەرمەك نارىمباي تاعى باسقا ەسكى جۇيە تارتىبىنە كونبەگەن ءبىراز ۇلتشىل ازاماتتار شەتەلدە ءجۇر.كەزىندە ولارعا نەبىر جالا جابىلدى، قۋعىن - سۇرگىن كوردى.
شىن مانىندە بۇ كىسىلەر ناعىز پاتريوتتار ەدى. بۇلار ءوز ۇستانىمدارى ءۇشىن جاپا شەكتى.ال بۇلاردى سول كەزدە قۋعىنداعان اكىم قارالاردىڭ كەشە ءبىر كۇندە بەيشارا بوپ قالعانىن دا كوردىك.
توقاەۆ وكىمەتى بۇل كىسىلەرگە راقىمشىلىق جاريالاپ، ولاردىڭ وتانعا ورالۋىنا سەبەپ بولىپ جاتسا، جاڭا بيلىكتىڭ حالىق الدىندا ابىرويى ارتپاسا، ودان ۇتىلمايدى دەپ ويلايمىن.
پالەن جىل سىرتتا جۇرگەن بەلسەندىلەرىمىز دە ەلمەن قاۋىشار ەدى.
سونشا جاسقا كەلىپ شەتەلگە كەتۋگە ءماجبۇر بولعان ولارعا سىرتتا وڭاي ەمەس ەكەنىن بىلەمىز، ولار كەيبىرەۋلەر سياقتى ول جاققا قارا باستارىن كۇيتتەپ كەتكەن جوق ەدى جالپى.
ولار كەزىندە ەلدە بولىپ جاتقان ادىلەتسىزدىككە شىداماي، جۇيەگە يا بولماسا ولاردىڭ ارتىندا تۇرعان وتارشىلدارعا قارسى شىعىپ، التاي مەن اتىراۋ اراسىندا داليىپ جاتقان كەڭ دالاسىنان وزدەرىنە ءبىر بۇرىش تابا الماي التى قىر اسىپ كەتتى.
بۇلاردىڭ سونشا جىل شەتەلدە جۇرسە دە، ەكى كوزدەرى ءتورت بولىپ قازاقستانعا تەلمىرىپ وتىرعانىن دا كورىپ وتىرمىز.
ال ىشتەرىندە ەلگە دەگەن زور ساعىنىش، مۇڭ، ءار الۋان سەزىم جاتقانىن اڭعارۋ قيىن ەمەس.
قازاق جالپى ەلگە، جەرگە، تۋعان توپىراققا ادال حالىق، زاتى سونداي.
قازىر بۇل كىسىلەرمەن سىيىسا الماعان شالدىڭ كوزى تايدى، ال ەل جاڭا وزگەرىستەرگە بەت العانداي...
ەندى پاتريوتتار ەلگە ورالۋى كەرەك.
