رەسەي پرەزيدەنتى ۆلاديمير پۋتين قازاقستان جانە وزبەكستانمەن قولدانىستاعى اسكەري-تەحنيكالىق ىنتىماقتاستىق تۋرالى كەلىسىمدەرگە وزگەرىستەر ەنگىزۋ جونىندە كەلىسسوزدەردى باستاۋدى تاپسىردى. ءتيىستى قۇجاتتار قۇقىقتىق اكتىلەر پورتالىندا جاريالاندى، دەپ حابارلايدى «ادىرنا» ءتىلشىسى.
رەسەي قازاقستانمەن اسكەري-تەحنيكالىق ىنتىماقتاستىق تۋرالى كەلىسىمدى 2013 جىلعى 24 جەلتوقساندا (2015 جىلى راتيفيكاتسيالانعان), ال وزبەكستانمەن 2016 جىلعى 29 قاراشادا جاساسقان. قۇجاتتار قارۋ-جاراق پەن اسكەري تەحنيكانى جەتكىزۋدى، اسكەري ماقساتتاعى ونىمدەرمەن الماسۋدى، تەحنولوگيالار مەن تەحنيكالىق قۇجاتتامانى بەرۋدى رەتتەيدى.
سوڭعى جىلدارى قازاقستان رەسەيدەن سۋ-30سم جويعىش ۇشاقتارىن (2022 جىلعا قاراي ولاردىڭ سانى 20-عا جەتتى), مي-171ش جانە مي-35م تىكۇشاقتارىن، «بۋك-م2ە» زەنيتتىك-زىمىران كەشەندەرىن، بتر-80 جانە بتر-82ا برونەترانسپورتەرلەرىن الدى. سونىمەن قاتار 2015 جىلى ماسكەۋ وڭىرلىك بىرىڭعاي اۋە قورعانىسى جۇيەسىن قۇرۋ باعدارلاماسى اياسىندا استاناعا بەس س-300پس زەنيتتىك-زىمىران جۇيەسىن تەگىن تاپسىرعان بولاتىن.
وزبەكستان 2017–2019 جىلدارى مەملەكەتتىك ەكسپورتتىق نەسيە اياسىندا جەتكىزىلگەن 12 مي-35م تىكۇشاعىن قابىلداپ، سونداي-اق شامامەن 30 ميگ-29 جويعىش ۇشاعىن جاڭعىرتتى. تاراپتار بۇعان قوسا سۋ-30سم ۇشاقتارىن، «سوپكا-2» راديولوكاتسيالىق كەشەنىن جانە «پەچورا-2م» زەنيتتىك-زىمىران كەشەنىنە ارنالعان جابدىقتاردى جەتكىزۋ ماسەلەسىن تالقىلاعان.
ايتا كەتەيىك، قازاقستان مەن رەسەي –ۇجىمدىق قاۋىپسىزدىك تۋرالى شارت ۇيىمىنىڭ مۇشەلەرى. ەكى مەملەكەت اراسىنداعى اسكەري ىنتىماقتاستىقتىڭ ەداۋىر بولىگى وسى ۇيىم شەڭبەرىندە جۇزەگە اسىرىلادى. ال وزبەكستانمەن ەكى ەلدىڭ اسكەري-اۋە كۇشتەرى مەن اۋە قورعانىسى اسكەرلەرىن بىرلەسىپ پايدالانۋ تۋرالى جەكە كەلىسىم قولدانىلادى.
