ءۇش جىلدا قازاقستاننان باسقا ەلدەرگە 2,4 تريلليون تەڭگەدەن استام قارجى جونەلتىلدى. LS اقپارات كوزى ولاردىڭ قايدا كوبىرەك اۋدارعانىن انىقتادى، دەپ جازادى "ادىرنا" سايتى.
ۇلتتىق بانكتىڭ مالىمەتىنشە، 2021 جىلى اقشا اۋدارىمدارىنىڭ كولەمى 1 تريلليون تەڭگەدەن استى، 2020 جىلى بۇل كورسەتكىش 787,7 ميلليارد تەڭگە، ال 2019 جىلى 655,2 ميلليارد تەڭگە دەڭگەيىندە بولدى. سوڭعى ءۇش جىلدا جالپى سوما 2,4 تريلليون تەڭگەدەن استام سومانى قۇرادى. وسى كەزەڭدە اقشا اۋدارىمدارىنىڭ كولەمى 52,6%-عا ءوستى.
اقشانىڭ باسىم بولىگى وزبەكستانعا كەتكەن. بۇل ەل بۇرىن جەتەكشى ورىن العان رەسەيدى ىعىستىرىپ تاستادى. ماسەلەن، سوڭعى ءبىر جىلدا وزبەكستانعا 298 ملرد تەڭگەدەن استام قاراجات اۋدارىلعان ء(ۇش جىلدا + 114,4%). ودان كەيىنگى ورىندا تۇركيا – 210,9 ملرد تەڭگە (+126%) جانە رەسەي – 177,2 ملرد تەڭگە (-15,1%).
سونىمەن قاتار، وسى كەزەڭدەگى ەڭ كوپ ءوسىم ارمەنيادا تىركەلدى، وعان 33,6 ملرد تەڭگە (+257,4%), گرۋزياعا – 32,8 ملرد تەڭگە (+180,3%) جانە قىرعىزستانعا – 144,4 ملرد تەڭگە (+65,6%) جونەلتىلدى.
اقشا اۋدارىمدارىنىڭ كولەمى تۋرالى تولىعىراق اقپارات ينفوگرافيكادا بەرىلگەن.
بۇعان دەيىن پرەزيدەنت قاسىم-جومارت توقاەۆ ۇلتتىق بانككە قارجى نارىعىن رەتتەۋ جانە قارجىلىق مونيتورينگ اگەنتتىكتەرىمەن بىرلەسىپ، بارلىق ترانزاكتسيالار مەن ەلدەن قاراجاتتى نەگىزسىز الىپ جاتقان تۇلعالارعا ناقتى مونيتورينگ، تەكسەرۋ جانە باقىلاۋدى قامتاماسىز ەتۋدى تاپسىرعانىن جازعان.
سونداي-اق ول ۇكىمەتكە زاڭسىز شىعارىلعان اقشانى ەلگە قايتارۋ بويىنشا ۇسىنىستار بەرۋدى تاپسىردى.
"ادىرنا" ۇلتتىق پورتالى
