ۇلتتىق ادەبيەت پەن مادەنيەتتىڭ، ونەر مەن عىلىمنىڭ، تاريحى مەن ەتنوگرافياسىنىڭ زەرتتەلۋى مەن زەردەلەنۋىنە، ناسيحاتتالۋى مەن دامۋىنا سۇبەلى ۇلەس قوسىپ كەلە جاتقان «زەينوللا سانىك اتىنداعى مادەنيەت قورى» شاكارىم ۋنيۆەرسيتەتىمەن بىرلەسە وتىرىپ تاعى ءبىر يگىلىكتى ىسكە ۇيىتقى بولىپ وتىر.
اتاپ ايتقاندا، سەمەيدەگى شاكارىم ۋنيۆەرسيتەتىندە كورنەكتى جازۋشى، ەتنوگراف، باسپاگەر، اۋدارماشى «زەينوللا سانىك اتىنداعى شەتەلدەگى قازاق ادەبيەتى ءدارىسحاناسى» اشىلماق. ونىڭ قاجەتتى جابدىقتاۋى قور دەمەۋشىلىگى ارقىلى ىسكە استى.
سونداي-اق، مادەنيەت قورى دارىسحاناعا شەتەلدەگى قازاق ادەبيەتى، تاريحى مەن ونەرىنە قاتىستى 100 دەن استام كىتاپتى سىيعا تارتتى.
بۇل ءبىلىم ورداسىنداعى وقىتۋشىلاردىڭ، ستۋدەنتتەر مەن ماگيسترلەردىڭ جانە زەرتتەۋشى عالىمداردىڭ قازاق ادەبيەتىنىڭ تۇتاستانۋ تاريحىن تانىپ ءبىلۋى مەن زەرتتەلۋىنە زور مۇمكىندىك تۋعىزباق.
بۇعان دەيىن دە وقۋ ورنى مەن قور اراسىندا شىعارماشىلىق بايلانىستار قالىپتاسىپ، عىلىمي باعىتتاعى ىزدەنۋشىلەرگە قور اتىنان شاكىرتاقى بەرىلگەن ەدى.
عىلىمنىڭ دامۋىنا بارىنشا جاعداي جاساۋدى ماقسات ەتكەن شاكارىم ۋنيۆەرسيتەتى مەن مادەنيەت قورىنىڭ ارىپتەستىگى مەن يگىلىكتى ءىس-شارالارى الداعى ۋاقىتتا دا جالعاسا بەرمەك.
ءدارىسحانانىڭ اشىلۋى اياسىندا «ز.سانىك قورىنىڭ» كىتاپحانا سەرياسىمەن جارىق كورگەن قىتايداعى قازاق پروزاسىنىڭ انتولوگياسى – «قامشىگەر» كىتابىنىڭ تانىستىرىلىمى وتەدى.
وعان 30 جازۋشىنىڭ تاڭداۋلى اڭگىمەلەرى ەنگەن. ءىس-شارا بارىسىندا قوناقتارمەن ادەبي كەزدەسۋ، كىتاپ كورمەسى، عىلىمي باعىتتاعى پىكىر الماسۋ جوسپارلانعان.
ءدارىسحانانىڭ اشىلۋىنا جازۋشىنىڭ جارى، اقىن، ۇستاز ءشامشابانۋ حامزاقىزى مەن قالامگەردىڭ پەرزەنتتەرى، قازاقستان جازۋشىلار وداعىنىڭ باسقارما توراعاسى، اقىن ۇلىقبەك ەسداۋلەت، ادەبيەتتانۋشى-عالىم سەرىك نەگيموۆ، اقىن، باسپاگەر عالىم قاليبەكۇلى، قوردىڭ اتقارۋشى ديرەكتورى، اقىن، ۇستاز سەرىك قاليەۆ، اقىن دۇيسەنالى الىماقىن، سەمەيدەگى زيالى قاۋىم وكىلدەرى، باق قىزمەتكەرلەرى ت،ب، قوناقتار قاتىسادى.
ۇيىمداستىرۋشى: شاكارىم ۋنيۆەرسيتەتى
ۋاقىتى: 4 ناۋرىز، 10:00
ورنى: شاكارىم ۋنيۆەرسيتەتىنىڭ №3 وقۋ عيماراتى، 2 قابات، قاشاعان كوشەسى 1
