بيىل قازاق كينو ونەرىنىڭ التىن قورىنا ەنگەن ايگىلى «قىز جىبەك» كوركەم ءفيلمىنىڭ ەكرانعا شىققانىنا 55 جىل تولدى، دەپ حابارلايدى "ادىرنا" ۇلتتىق پورتالى.
1970 جىلى رەجيسسەر سۇلتان قوجىقوۆ تۇسىرگەن بۇل تۋىندى قازاق ۇلتتىق كينەماتوگرافياسىنداعى ەڭ كورنەكتى شىعارمالاردىڭ ءبىرى سانالادى.
فيلم قازاق حالىق ەپوسى نەگىزىندە ءتۇسىرىلىپ، ءبىر-بىرىمەن جاۋلاسقان رۋلار اراسىنداعى قايشىلىق اياسىندا وربىگەن تولەگەن مەن جىبەكتىڭ تراگەديالىق ماحابباتىن سۋرەتتەيدى. كينوتۋىندى كورەرمەننىڭ زور ىقىلاسىنا يە بولىپ، ناعىز حالىقتىق فيلمگە اينالدى. «قىز جىبەك» الەمنىڭ 70-تەن استام ەلىندە كورسەتىلىپ، قازاق مادەنيەتىن حالىقارالىق دەڭگەيدە تانىتتى.
باستى رولدەردى سول كەزدە نەبارى 17 جاستاعى اكتەرلەر قۇمان تاستانبەكوۆ پەن مەرۋەرت وتەكەشوۆا سومدادى. ال بەكەجان بەينەسىن ءاسانالى ءاشىموۆ ورىندادى. ءفيلمنىڭ ستسەناريىن عابيت مۇسىرەپوۆ جازسا، مۋزىكاسىن نۇرعيسا تىلەنديەۆ، ءان ماتىندەرىن قادىر مىرزا ءالى جازعان.
كينوتۋىندى جاركەنت وڭىرىندە ءتۇسىرىلىپ، 1970 جىلى الماتى قالاسىنداعى «تسەليننىي» كينوتەاترىندا العاش رەت كورەرمەنگە جول تارتتى. ال 1971 جىلى ماسكەۋدە وتكەن بۇكىلوداقتىق تۇساۋكەسەردەن كەيىن فيلم كەڭىنەن تانىمال بولدى.
«قىز جىبەك» ءۇشىن رەجيسسەر سۇلتان قوجىقوۆ، ستسەناري اۆتورى عابيت مۇسىرەپوۆ جانە باستى رولدەگى اكتەرلەر 1972 جىلى قازاق كسر مەملەكەتتىك سىيلىعىنا يە بولدى.
