قازاق كينوسىنىڭ جاۋھارى “قىز جىبەك” فيلمىندەگى جىبەك ءرولىن سومداعان اكتريسا مەرۋەرت وتەكەشوۆا تەاتر ءۇشىن ورنى تولماس اۋىر قازا بولعان ءاسانالى ءاشىموۆتى اقتىق ساپارعا شىعارىپ سالۋ راسىمىندە ەسكە الدى، دەپ حابارلايدى "ادىرنا" ۇلتتىق پورتالى.
اكتريسا مارقۇمنىڭ قازاسىن تەاتر ءۇشىن اۋىر جوعالتىلىق دەپ اتاپ، ءاسانالى ءاشىموۆتىڭ ەسىمى ەل جۇرەگىندە ماڭگى ساقتالاتىنىن ايتتى.
“بۇل – تەاتر ءۇشىن ورنى تولماس قايعى. ءبىزدىڭ سۇيىكتى ءاسانالى اعامىز الىس ساپارعا اتتاندى. بىراق ول جۇرەگىمىزدە ماڭگى قالادى. حالىق ونى ەشقاشان ۇمىتپايدى. ءاسانالى اعانىڭ ويناعان رولدەرى دە، تۇسكەن فيلمدەرى دە، سىڭىرگەن ەڭبەگى دە ۇشان-تەڭىز”، – دەدى مەرۋەرت وتەكەشوۆا.
اكتريسانىڭ ايتۋىنشا، ءاسانالى ءاشىموۆ ونەر جولىنىڭ باسىندا جۇرگەن كەزىندە وعان اعا، ۇستاز جانە دوس رەتىندە كوپ دەمەۋ بولعان.
“ماعان ءاسانالى اعا اعا رەتىندە دە، اكتەر، ۇستاز، دوس رەتىندە دە كوپ كومەك كورسەتتى. ونەر جولىن ەندى باستاعان كەزىمدە مەن وتە جاس ەدىم. تولەگەنىم الىس ساپارعا كەتتى، ەندى بەكەجانىم - ءاسانالى اعا دا بۇگىن الىس جولعا اتتاندى. ەندى ولار جوعارىدا ءبىر-بىرىمەن قاۋىشىپ، بىزگە جۇلدىزداي قاراپ، قامقورلىعىن كورسەتەتىن شىعار. اتتەڭ، ءبىر جىل جەتپەي قالدى. كەلەسى جىلى تەاترىمىزدىڭ 100 جىلدىعى تويلانادى. قالاي بولعاندا دا، ءاسانالى اعانىڭ ورنىن ەشكىم باسا المايدى”، – دەدى اكتريسا.
