ايگىلى «سۇلەيمەن سۇلتان» سەريالىندا حيۋررەم سۇلتاننىڭ ءرولىن سومداعان اكتريسا مەرەم ۋزەرلي كەلەر جىلدىڭ باسىندا قازاقستانعا كەلەدى دەپ جازادى وتاندىق بانكتىڭ Instagram پاراقشاسى، دەپ حابارلايدى “ادىرنا” ۇلتتىق پورتالى kznews.kz سايتىنا سىلتەمە جاساپ.
اكتريسا قازاقستاندا وتەتىن الەمدىك ازيا كينوفەستيۆالى Aitysh Asian World Film Festival تۇساۋكەسەرىنە شاقىرىلادى جانە تەلەحيكايالار ءۇشىن ارنايى ماراپاتقا يە بولادى.
بۇل ازيانىڭ، ورتالىق، شىعىس جانە سولتۇستىك افريكانىڭ 50-دەن استام ەلىن قامتيتىن العاشقى جوبا بولماق.
تەلەحيكايالار ءۇشىن جاڭا سىياقىنى ۇيىمداستىرۋشىلاردىڭ ءبىرى – ەۋرازيالىق بانكتىڭ ديرەكتورلار كەڭەسىنىڭ مۇشەسى، بەلگىلى قازاقستاندىق كاسىپكەر شۋحرات يبراگيموۆ.
«بۇل جوبانىڭ كومەگىمەن ءبىز بۇكىل الەمگە ايماقتىق تەلەحيكايالاردىڭ شىعارماشىلىق جانە تەحنيكالىق مۇمكىندىكتەرىن كورسەتكىمىز كەلەدى. مەن دۇنيەجۇزىلىك ازيا كينوفەستيۆالىنىڭ توراعاسى جانە جاڭا جوبانىڭ نەگىزىن قالاۋشى بولۋ قۇرمەتىنە يە بولعانىما قۋانىشتىمىن»، – دەدى يبراگيموۆ.
قازاقستاندىق تۇساۋكەسەرگە مەرەم ۋزەرليدەن باسقا كورەيا، رەسەي، قىتاي جانە باسقا ەلدەردىڭ ايگىلى تەلەحيكايالارىنىڭ جۇلدىزدارى شاقىرىلادى. Asian World TV Series Awards-تىڭ ماراپاتتاۋ ءراسىمى 2022 جىلدىڭ مامىر ايىنىڭ باسىندا ستامبۋلدا وتەدى.
”ادىرنا” ۇلتتىق پورتالى
