قارقارالىنىڭ قىمىزى ەلىمىز بويىنشا ەڭ ۇزدىك دەپ تانىلدى. BaiQymyz-2026 فەستيۆالىندە اۋداننىڭ قىمىز وندىرۋشىلەرى ەكى بىردەي جۇلدەنى يەلەندى: باس جۇلدە جانە ەكىنشى ورىن. جەڭىس ءۇشىن قاراعاندى وبلىسى مەن قازاقستاننىڭ وزگە وڭىرلەرىنەن كەلگەن 37 شارۋاشىلىق باق سىنادى.
فينالعا دەيىن قاتىسۋشىلار قاتاڭ ىرىكتەۋدەن ءوتتى: ماماندار سۋسىننىڭ ساپاسىن زەرتحانالاردا تەكسەرىپ، شارۋاشىلىقتاردىڭ جۇمىسىن باعالادى.
جەڭىمپازداردى عالىمدار، قوعام جانە مادەنيەت قايراتكەرلەرىنەن قۇرالعان قازىلار القاسى انىقتادى.
سونىمەن قاتار، فەستيۆال قوناقتارى دا وزدەرىنە ۇناعان قىمىزعا داۋىس بەرۋ مۇمكىندىگىنە يە بولدى.
«ەڭ ۇزدىك قىمىز» اتاعى مەن 5 ميلليون تەڭگەلىك سەرتيفيكات قارقارالى اۋدانى اقتەرەك اۋىلىنىڭ وكىلدەرى - جك مۇحامەد-ءاليدىڭ «قارقارالى اقتەرەك» برەندىنە بۇيىردى.
— ەڭبەگىمىز اقتالدى. قىمىز وندىرۋمەن اتا-انام اينالىسقان، ءبىز سول جولدى 17 جىلدان بەرى وتباسىمىزبەن جالعاستىرىپ كەلەمىز. باستاعان كەزدە ءبىر عانا بيەمىز بولعان ەدى. BaiQymyz — وتە كەرەمەت جوبا. بۇل تەك العاشقى قادام دەپ ويلايمىن. الداعى جوسپارىمىز — حالىقارالىق نارىققا شىعۋ، - دەدى جەڭىمپاز بۇرحان جولتاەۆ.
ەكىنشى ورىندى جانە 3 ميلليون تەڭگەنى قارقارالى اۋدانى توقپان اۋىلىنان «توقپان قىمىزى» برەندى يەلەندى.
ءۇشىنشى ورىن ۇلىتاۋ وبلىسىنان كەلگەن «جاڭاارقا قىمىزى» برەندىنە بۇيىرىپ، 1,5 ميلليون تەڭگە تابىستالدى.
سونىمەن قاتار، ارنايى نوميناتسيالار بويىنشا دا جەڭىمپازدار انىقتالدى.
فەستيۆالگە 30 توننا قىمىز اكەلىندى.
قوناقتار ۇلتتىق سۋسىننىڭ ءتۇرلى تۇرلەرىن تەگىن تاتىپ كورىپ، وزدەرىنە ۇناعانىنا داۋىس بەرە الدى.
سونداي-اق، فەستيۆال اياسىندا ەتنواۋىلدار جۇمىس ىستەپ، ۇلتتىق سپورت تۇرلەرىنەن جارىستار، قولونەرشىلەر كورمەلەرى جانە ۇلكەن كونتسەرتتىك باعدارلاما ۇيىمداستىرىلدى.
دودالار اراسىندا تازى جارىستارى كورەرمەندەردىڭ ەرەكشە قىزىعۋشىلىعىن تۋدىردى. جارىسقا پاۆلودار، اقمولا جانە قاراعاندى وبلىستارىنان، سونداي-اق استانادان كەلگەن ەڭ جۇيرىك ءارى ءتوزىمدى 25 تازى قاتىستى.
باس جۇلدەنى اقمولا وبلىسىنان كەلگەن اققۇس اتتى تازى جەڭىپ الدى. ەكى جاستاعى ءيتتىڭ بىرنەشە جەتىستىگى مەن ماراپاتتارى بار.
— تازى وسىرۋمەن بۇرىن اكەم اينالىسقان، سول كىسىدەن جانە تۋىستارىمنان وسى سۇيىسپەنشىلىك دارىعان. مەنىڭ تازىم وتە اقىلدى ءارى جىلدام. بۇل جارىسقا جەڭىسكە جەتەمىن دەگەن نيەتپەن كەلدىم. ءبارى ويداعىداي بولدى، باسەكە وتە كۇشتى بولدى، - دەدى تازى يەسى بىرلىك ۋاليەۆ.
فەستيۆال قازاقتىڭ ءداستۇرى، قوناقجايلىعى مەن ۇلتتىق مادەنيەتىنىڭ ناعىز مەرەكەسىنە اينالدى. ءبىر كۇننىڭ ىشىندە ونى 20 مىڭنان استام ادام تاماشالادى.
كەلۋشىلەر سانىنىڭ كوپ بولۋىنا بايلانىستى قاراعاندىدان ارنايى تەگىن اۆتوبۋستار سانى تورتتەن التىعا دەيىن كوبەيتىلدى.
بيىلدان باستاپ BaiQymyz فەستيۆالى رەسپۋبليكالىق مادەني-تۋريستىك ءىس-شارالار كۇنتىزبەسىنە ەنگىزىلىپ، جىل سايىن وتكىزىلمەك.
