23-24 ساۋىردە تاراز قالاسىنداعى «كونە تاراز» تاريحي-ەتنومادەني كەشەنىندە «تاراز – قولونەرشىلەر قالاسى» حالىقارالىق قولونەرشىلەر فەستيۆالى ۇيىمداستىرىلادى.
ۇلتتىق فەستيۆالدى وتكىزۋدەگى نەگىزگى ماقسات – ءوڭىردىڭ تۋريستىك ءيميدجىن كوتەرۋ، وتاندىق قولونەرشىلەردى حالىقارالىق دەڭگەيدە تانىمال ەتۋ، شەتەلدىك جانە جەرگىلىكتى قولونەرشىلەر اراسىندا دوستىق قارىم-قاتىناس پەن ىنتىماقتاستىق ورناتۋ، تاجىريبە الماسۋ، سونداي-اق، كەنجە قالىپ بارا جاتقان ەجەلگى قولونەر تۇرلەرىن ساقتاۋ جانە قايتا جاڭعىرتۋ.
فەستيۆالعا شەتەلدەن (قىرعىزستان، وزبەكستان، تاجىكستان), كورشى وڭىرلەردەن (الماتى، تۇركىستان) كەلەتىن جانە جەرگىلىكتى 100-دەن استام شەبەر قاتىسادى.
فەستيۆال اياسىندا كورەرمەندەرگە ەرەكشە كوڭىل كۇي سىيلاۋ ماقساتىندا «تاراز – قولونەرشىلەر قالاسى. ءداستۇر مەن زاماناۋي قولونەر» تاقىرىبىندا عىلىمي-پراكتيكالىق كونفەرەنتسيا، قولونەر بۇيىمدارىنىڭ كورمەسى مەن شەبەرلىك ساعاتتارى، «مەنىڭ الەمىم: قيال مەن شىنايىلىق» اتتى جاس قولونەرشىلەر مەن سۋرەتشىلەردىڭ كورمەسى وتەدى.
ودان بولەك ءسان مەن ءداستۇردى توعىستىراتىن «ASPARA FASHION WEEK» حالىقارالىق ءسان اپتالىعى، «گيننەس» رەكوردتار كىتابىنا ەنگەن كيىزدىڭ جانىندا «Dombyra Party» ءىس-شاراسى، ۇلتتىق ناقىشتاعى كيىمدەردىڭ ءسان كورسەتىلىمى جانە ونەر جۇلدىزدارىنىڭ گالا-كونتسەرتى ۇيىمداستىرىلادى.
فەستيۆالگە قاتىسۋشى قوناقتارعا كورمە بۇيىمدارىن ساتىپ الۋعا جانە تاراز قالاسىنداعى تاريحي-مادەني ورىندارعا ەكسكۋرسيا جاساۋىنا تولىق مۇمكىندىك قاراستىرىلعان.
بۇل كۇندەرى تاراز ۇلتتىق ءداستۇر مەن شالقىما شابىتتىڭ توعىسقان ورتاق مەكەنىنە اينالماق.
