شىعىس قازاقستان وبلىسىندا 10-12 شىلدە ارالىعىندا كاتونقاراعاي اۋدانىندا وتەتىن «التاي – تۇركى الەمىنىڭ التىن بەسىگى» حالىقارالىق فەستيۆالىنە دايىندىق جالعاسۋدا. اۋقىمدى ەتنومادەني فورۋمنىڭ باستى وقيعالارىنىڭ ءبىرى – الەمگە تانىمال قازاقستاندىق ءانشى ديماش قۇدايبەرگەننىڭ ونەر كورسەتۋى بولماق.
ۇيىمداستىرۋشىلاردىڭ مالىمەتىنشە، ونەرپاز فەستيۆالگە قاتىسۋىن راستاعان. اتالعان شارا قازاقستاننىڭ رەسمي تۋريستىك ءىس-شارالار كۇنتىزبەسىنە ەنگىزىلگەن. ديماشتىڭ كونتسەرتى وڭىرگە الەمنىڭ ءار تۇكپىرىنەن كەلەتىن قوناقتار سانىن ارتتىرادى دەپ كۇتىلۋدە.
كاتونقاراعاي ەلىمىزدەگى ەڭ كوركەم تۋريستىك وڭىرلەردىڭ ءبىرى سانالادى. مۇندا جىل سايىن تۋريستەر سانى ارتىپ كەلەدى، ال جۇزەگە اسىرىلىپ جاتقان ينۆەستيتسيالىق جوبالار زاماناۋي تۋريستىك ينفراقۇرىلىمنىڭ دامۋىنا سەرپىن بەرۋدە. وڭىردە جىل بويى جۇمىس ىستەيتىن قوناقۇي كەشەندەرى مەن تۋريستىك اۋىلدار سالىنىپ، تاۋ شاڭعىسى باعىتتارى مەن ەكولوگيالىق تۋريزم دامىپ كەلەدى.
فەستيۆال باعدارلاماسى مادەني، سپورتتىق جانە تۋريستىك ءىس-شارالاردى قامتيدى. قوناقتاردى كونتسەرتتىك باعدارلامالار، ۇلتتىق ويىندار، قولونەرشىلەر كورمەلەرى، ەتنومادەني جوبالار جانە تۇركى حالىقتارىنىڭ سالت-داستۇرلەرىمەن تانىستىرۋ شارالارى كۇتەدى.
11 شىلدە كۇنى ساعات 19:00-دە ساحناعا قازاقستان، ازەربايجان، ماجارستان، قىرعىزستان، وزبەكستان، تۇركيا، موڭعوليا، باشقۇرتستان جانە رەسەي فەدەراتسياسىنىڭ تىۆا رەسپۋبليكاسىنان كەلگەن ونەرپازدار شىعادى.
ولاردىڭ قاتارىندا Efendi, Jax, Aizana, الىشەر باينيازوۆ، سەۆاراحون تۋلانوۆا، مۋرات ياپراك، سۇبەدەي سامدىن، Hazina, NOX, تورەعالي تورەالى جانە سارمات توپتارى بار. كەشتىڭ باستى حەدلاينەرى – ديماش قۇدايبەرگەن.
ۇيىمداستىرۋشىلاردىڭ پىكىرىنشە، فەستيۆال جارقىن مادەني وقيعا عانا ەمەس، سونىمەن قاتار شىعىس قازاقستانداعى تۋريزم سالاسىنىڭ دامۋىنا قوسىمشا سەرپىن بەرىپ، ءوڭىردىڭ ەلىمىزدەگى جەتەكشى تۋريستىك ورتالىقتاردىڭ ءبىرى رەتىندەگى مارتەبەسىن نىعايتادى.
