Ulttyq ádebıet pen mádenıettiń, óner men ǵylymnyń, tarıhy men etnografııasynyń zerttelýi men zerdelenýine, nasıhattalýy men damýyna súbeli úles qosyp kele jatqan «Zeınolla Sánik atyndaǵy mádenıet qory» Shákárim ýnıversıtetimen birlese otyryp taǵy bir ıgilikti iske uıytqy bolyp otyr.
Atap aıtqanda, Semeıdegi Shákárim ýnıversıtetinde kórnekti jazýshy, etnograf, baspager, aýdarmashy «Zeınolla Sánik atyndaǵy Sheteldegi qazaq ádebıeti dárishanasy» ashylmaq. Onyń qajetti jabdyqtaýy qor demeýshiligi arqyly iske asty.
Sondaı-aq, mádenıet qory dárishanaǵa sheteldegi qazaq ádebıeti, tarıhy men ónerine qatysty 100 den astam kitapty syıǵa tartty.
Bul bilim ordasyndaǵy oqytýshylardyń, stýdentter men magıstrlerdiń jáne zertteýshi ǵalymdardyń qazaq ádebıetiniń tutastaný tarıhyn tanyp bilýi men zerttelýine zor múmkindik týǵyzbaq.
Buǵan deıin de oqý orny men qor arasynda shyǵarmashylyq baılanystar qalyptasyp, ǵylymı baǵyttaǵy izdenýshilerge qor atynan shákirtaqy berilgen edi.
Ǵylymnyń damýyna barynsha jaǵdaı jasaýdy maqsat etken Shákárim ýnıversıteti men mádenıet qorynyń áriptestigi men ıgilikti is-sharalary aldaǵy ýaqytta da jalǵasa bermek.
Dárishananyń ashylýy aıasynda «Z.Sánik qorynyń» kitaphana serııasymen jaryq kórgen qytaıdaǵy qazaq prozasynyń antologııasy – «Qamshyger» kitabynyń tanystyrylymy ótedi.
Oǵan 30 jazýshynyń tańdaýly áńgimeleri engen. Is-shara barysynda qonaqtarmen ádebı kezdesý, kitap kórmesi, ǵylymı baǵyttaǵy pikir almasý josparlanǵan.
Dárishananyń ashylýyna jazýshynyń jary, aqyn, ustaz Shámshabaný Hamzaqyzy men qalamgerdiń perzentteri, Qazaqstan Jazýshylar odaǵynyń basqarma tóraǵasy, aqyn Ulyqbek Esdáýlet, ádebıettanýshy-ǵalym Serik Negımov, aqyn, baspager Ǵalym Qalıbekuly, qordyń atqarýshy dırektory, aqyn, ustaz Serik Qalıev, aqyn Dúısenáli Álimaqyn, Semeıdegi zııaly qaýym ókilderi, BAQ qyzmetkerleri t,b, qonaqtar qatysady.
Uıymdastyrýshy: Shákárim ýnıversıteti
Ýaqyty: 4 naýryz, 10:00
Orny: Shákárim ýnıversıtetiniń №3 oqý ǵımaraty, 2 qabat, Qashaǵan kóshesi 1
