قازاقستان رەسپۋبليكاسىنىڭ ۇلتتىق مۋزەيىندە «ۇلى دالا تاريحى يران دەرەكتەرىندە» اتتى كورمە اشىلدى، دەپ حابارلايدى "ادىرنا" ۇلتتىق پورتالى.
بۇل تۋرالى مادەنيەت جانە اقپارات مينيسترلىگى مالىمدەدى.
كورمەگە العاش رەت يران يسلام رەسپۋبليكاسىنىڭ سىرتقى ىستەر مينيسترلىگى ارحيۆتەرىنەن تابىلعان 27 ەجەلگى پارسى قولجازباسىنىڭ كوشىرمەلەرى قويىلدى.
كورمەدەگى ەكسپوناتتار XVIII–XIX عاسىرلاردا قازاقستان اۋماعىندا بولعان الەۋمەتتىك-ساياسي جانە ەكونوميكالىق ۇدەرىستەر تۋرالى قۇندى مالىمەتتەردى قامتيدى.
كورمە بۇدان الدىن مەملەكەت باسشىسى قاسىم-جومارت توقاەۆ پەن يران يسلام رەسپۋبليكاسىنىڭ پرەزيدەنتى ماسۋد پەزەشكياننىڭ نازارىنا ۇسىنىلعان بولاتىن.
قۇجاتتار يران پرەزيدەنتىنىڭ استاناعا رەسمي ساپارى اياسىندا قازاقستانعا بەرىلگەن.
ەكسپوزيتسيامەن تانىسقان مەملەكەت باسشىسى يراندىق ارىپتەسىنە تاريحي ماتەريالداردى ۇسىنعانى ءۇشىن العىس ايتىپ، ولاردىڭ وتاندىق عىلىم مەن قوعام ءۇشىن ماڭىزدىلىعىن اتاپ ءوتتى.
"بۇل – وتە قۇندى سىيلىق. ءبىز مىندەتتى تۇردە قازاق قاۋىمىنا بۇل كورمەنى كورسەتىپ، بۇقارالىق اقپارات قۇرالدارى ارقىلى كەڭىنەن دارىپتەيمىز. بۇرىن بەيمالىم بولعان تاريحي دەرەكتەر بار. قازاق حالقىنا پايداسى زور بولادى دەپ ويلايمىن", – دەدى قاسىم-جومارت توقاەۆ.
قولجازبالاردا قازاق حاندىعىنىڭ الەۋمەتتىك-ەكونوميكالىق جاعدايى، تاۋكە جانە ابىلقايىر حانداردىڭ يران شاحتارىمەن ديپلوماتيالىق بايلانىستارى، تۇركىستانداعى ساياسي احۋال، سونداي-اق كومىر، تەمىر، مىس، قورعاسىن جانە بيريۋزا كەنىشتەرىن يگەرۋ ماسەلەلەرى سيپاتتالعان.
ارحيۆتىك ماتەريالدار قازاقستان مەن يران اراسىنداعى تاريحي بايلانىستاردىڭ تىعىز بولعانىن كورسەتەدى. ەكى ەل اۋماعى ارقىلى ۇلى جىبەك جولى ءوتىپ، ساۋدا، مادەني جانە رۋحاني ىقپالداستىقتىڭ دامۋىنا جول اشقان.
