بولونيا قالاسىندا قازاقستان ءۇشىن تاريحي ماڭىزى بار وقيعا — قازاقى تازىنىڭ World Dog Show 2026 باعدارلاماسىنا قاتىسۋى اياقتالدى. بۇل كورمە الەمدىك كينولوگياداعى ەڭ ماڭىزدى ءارى بەدەلدى ءىس-شارالاردىڭ ءبىرى بولىپ سانالادى.
2026 جىلعى 2–7 ماۋسىم ارالىعىندا حالىقارالىق كينولوگيالىق قاۋىمداستىقتىڭ نازارى يتالياعا اۋدى. بولونيادا الەمنىڭ ءارتۇرلى ەلدەرىنەن تورەشىلەر، ساراپشىلار، وسىرۋشىلەر، يەلەر جانە ۇلتتىق كينولوگيالىق ۇيىمداردىڭ وكىلدەرى جينالدى. قازاقستان ءۇشىن بۇل ءىس-شارانىڭ ورنى ەرەكشە بولدى: الەمدىك كينولوگيانىڭ باستى الاڭدارىنىڭ بىرىندە 2024 جىلى FCI حالىقارالىق كينولوگيالىق فەدەراتسياسى تاراپىنان الدىن الا تانىلعان ۇلتتىق تۇقىم — قازاقى تازى تانىستىرىلدى.
قازاقستان كينولوگتار وداعىنىڭ World Dog Show 2026 كورمەسىنە قاتىسۋى تۇقىمدى تۇپكىلىكتى حالىقارالىق تانۋعا باعىتتالعان جۇيەلى جۇمىستىڭ ماڭىزدى كەزەڭى بولدى.
2 ماۋسىمدا وتكەن FCI سۋديالارىنىڭ IV دۇنيەجۇزىلىك كونگرەسىنە قاتىسۋ ەرەكشە ماڭىزعا يە بولدى. بۇل — الەمنىڭ تۇكپىر-تۇكپىرىنەن تورەشى-ساراپشىلار جينالاتىن كاسىبي الاڭ. كونگرەسس اياسىندا قازاقستان كينولوگتار وداعى قازاقى تازىعا ارنالعان ارنايى ءدارىس ۇسىندى. حالىقارالىق تورەشىلەر كورپۋسىنا تۇقىمنىڭ تاريحى، قازاق حالقىنىڭ ءداستۇرلى مادەنيەتىمەن بايلانىسى، تازىنىڭ فۋنكتسيونالدىق ماقساتى، تۇقىمدىق ءتيپى، ەكستەرەرى، وزىنە ءتان قوزعالىستارى، تەمپەرامەنتى جانە رينگتەگى ساراپتامالىق باعالاۋ ەرەكشەلىكتەرى تانىستىرىلدى.
بۇل فورمات تۇقىمدى جاي عانا تانىستىرۋ ءۇشىن ەمەس، FCI سۋديالارى اراسىندا قازاقى تازى تۋرالى دۇرىس كاسىبي تۇسىنىك قالىپتاستىرۋ ءۇشىن ماڭىزدى بولدى. بۇل الدىن الا حالىقارالىق تانۋ كەزەڭىندە ەرەكشە مانگە يە، ويتكەنى تۇقىمنىڭ الەمدىك ارەناداعى ءاربىر تانىستىرىلىمى ونىڭ ءارى قاراي قابىلدانۋىنا، دامۋىنا جانە تۇپكىلىكتى تانىلۋىنا ىقپال ەتەدى.
قازاقستاننىڭ World Dog Show 2026 كورمەسىنە قاتىسۋىنىڭ ماڭىزدى بولىگى قازاقستان كينولوگتار وداعىنىڭ قازاقى تازىعا ارنالعان پرەزەنتاتسيالىق ستەندىنىڭ جۇمىسى بولدى.
قازاقستان ستەندى كورمەنىڭ ءدال ورتاسىندا ورنالاسىپ، العاشقى كۇننەن باستاپ World Dog Show 2026 كورمەسىندەگى ەڭ كوزگە تۇسەتىن ءارى كوپشىلىك كەلەتىن الاڭداردىڭ بىرىنە اينالدى. ول تورەشىلەردىڭ، وسىرۋشىلەردىڭ، يت يەلەرىنىڭ، ۇلتتىق كينولوگيالىق ۇيىمدار وكىلدەرىنىڭ، كورمە قوناقتارىنىڭ جانە حالىقارالىق باق-تىڭ نازارىن اۋداردى.
ستەندكە كەلگەن قوناقتار قازاقى تازىنىڭ تاريحىمەن، ونىڭ فۋنكتسيونالدىق ماقساتىمەن، تۇقىمدىق ەرەكشەلىكتەرىمەن، قازىرگى اسىل تۇقىمدىق جۇمىستىڭ جاي-كۇيىمەن جانە قازاقستاننىڭ تازىنىڭ شىققان ەلى رەتىندەگى رولىمەن تانىسا الدى.
ستەند تەك اقپاراتتىق الاڭ عانا ەمەس، ناعىز تارتىمدى ورتالىققا اينالدى. قوناقتار ستەندكە ۇلكەن قىزىعۋشىلىقپەن توقتاپ، قازاقستان وكىلدەرىمەن اڭگىمەلەسىپ، ونىڭ فونىندا قۋانا سۋرەتكە ءتۇستى. كوپتەگەن قاتىسۋشىلار مەن كورمە قوناقتارىنىڭ پىكىرىنشە، قازاقستاننىڭ ۇلتتىق ستەندى World Dog Show 2026 كورمەسىندەگى ەڭ جارقىن، مازمۇندى جانە ەستە قالارلىق ستەندتەردىڭ ءبىرى بولدى.
قاتىسۋدىڭ شارىقتاۋ كەزەڭى 5 جانە 6 ماۋسىم كۇندەرى وتكەن قازاقى تازىلاردىڭ رينگتىك كورسەتىلىمدەرى بولدى. تۇقىم وكىلدەرى بىردەن ءۇش ماڭىزدى كورمەلىك كەزەڭگە قاتىستى: Club Show 2026, ENCI Winner 2026 جانە WorldDog Show 2026.
ەڭ باستى ورتاق ناتيجە رەتىندە مىنانى اتاپ ءوتۋ قاجەت: بارلىق قازاقى تازىلار «ۇزدىك» باعاسىن الدى. بۇل ۇسىنىلعان يتتەردىڭ جوعارى ساپاسىن عانا ەمەس، قازاقستاندا ۇلتتىق تۇقىمدى ساقتاۋ جانە دامىتۋ بويىنشا اسىل تۇقىمدىق جۇمىستىڭ جۇيەلى ءارى دۇرىس جولعا قويىلعانىن دالەلدەيدى.
2026 جىلعى 5 ماۋسىمدا قازاقى تازى Club Show 2026— يتاليانىڭ ۇلتتىق دارەجەدەگى كورمەسىندە تانىستىرىلدى.
Club Show 2026 قورىتىندىسى بويىنشا ۇزدىك جاس ارلان بولىپ استانادان كەلگەن اكتابان, ۇزدىك جاس ۇرعاشىبولىپ الماتىدان كەلگەن تابيگات تانىلدى. ۇزدىك ارلاناتاعىن استانادان كەلگەن لاشىن, ال ۇزدىك ۇرعاشى اتاعىن استانادان كەلگەن رەيا يەلەندى. سالىستىرۋ قورىتىندىسى بويىنشا تۇقىمنىڭ ۇزدىك وكىلى جانە Club Show 2026 جەڭىمپازى بولىپ لاشىن تانىلدى.
سول كۇنى قازاقى تازىلار ENCI Winner 2026 — حالىقارالىق دارەجەدەگى كورمەگە دە قاتىستى. ۇزدىك جاس ارلان بولىپ الماتىدان كەلگەن چەلسي, ۇزدىك جاس ۇرعاشىبولىپ الماتىدان كەلگەن تابيگات تانىلدى. ۇزدىك ارلاناتاعىن استانادان كەلگەن پەرس, ۇزدىك ۇرعاشى اتاعىن استانادان كەلگەن رەيا يەلەندى. تۇقىمنىڭ ۇزدىك وكىلى جانە ENCI Winner 2026 جەڭىمپازى بولىپ پەرس تانىلدى.
پەرستىڭ تاريحي ناتيجەسىن ەرەكشە اتاپ وتكەن ءجون: تۇقىم ىشىندە جەڭىسكە جەتكەننەن كەيىن ول ءوز جاس ساناتىندا باسقا بورزىلارمەن باسەكەگە ءتۇسىپ، 4-ورىنعا يە بولدى. قازاقى تازى ءۇشىن مۇنداي دەڭگەيدەگى حالىقارالىق الاڭدا بۇل ماڭىزدى جەتىستىك جانە تۇقىمدى ىلگەرىلەتۋدەگى جاڭا بەلەس بولدى.
2026 جىلعى 6 ماۋسىمدا قازاقى تازى World Dog Show2026 نەگىزگى باعدارلاماسىندا — FCI جۇيەسىندەگى الەم چەمپيوناتىندا تانىستىرىلدى.
World Dog Show 2026 قورىتىندىسى بويىنشا ۇزدىك جاس ارلان بولىپ الماتىدان كەلگەن چەلسي, ۇزدىك جاس ۇرعاشى بولىپ الماتىدان كەلگەن تابيگات تانىلدى. ۇزدىك ارلان اتاعىن استانادان كەلگەن لاشىن, ۇزدىك ۇرعاشىاتاعىن استانادان كەلگەن رەيا يەلەندى. تۇقىمنىڭ ۇزدىك وكىلى جانە World Dog Show 2026 جەڭىمپازى بولىپ لاشىنتانىلدى.
تۇقىم ىشىندە جەڭىسكە جەتكەننەن كەيىن چەلسي مەن لاشىن ءوز جاس ساناتتارىندا باسقا بورزىلارمەن باسەكەنى جالعاستىردى. كەيىنگى سالىستىرۋ قورىتىندىسى بويىنشا چەلسي 4-ورىنعا يە بولدى. بۇل قازاقى تازى ءۇشىن الەمدىك كورمە ارەناسىنداعى تاعى ءبىر تاريحي ناتيجە بولدى.
World Dog Show 2026 قورىتىندىسى بويىنشا جاس الەم چەمپيونى اتاقتارىن چەلسي مەن تابيگات الدى. الەم چەمپيونى اتاقتارىن لاشىن مەن رەيا يەلەندى.
وسىلايشا، كورمەلىك باعدارلاما قورىتىندىسى بويىنشا يتاليا چەمپيونى اتاقتارىن داستەر, لاشىن، رەيا, پەرس، ارلان جانە كەربەز الدى، ال ساربازچەمپيوندار كلاسىندا رەزەرۆتىك جەڭىمپاز اتاندى. يتاليانىڭ جاس چەمپيونى اتاقتارىن چەلسي، تابيگاتجانە اكتابان يەلەندى.
بۇل ناتيجەلەر قازاقستان ءۇشىن ەرەكشە ماڭىزعا يە. قازاقى تازى World Dog Show 2026 كورمەسىندە جاي عانا تانىستىرىلىپ قويعان جوق — تۇقىم الەمدىك ارەنادا ءوزىن سەنىمدى تۇردە كورسەتتى، جوعارى ساراپتامالىق باعا الدى، حالىقارالىق قاۋىمداستىقتىڭ نازارىن اۋداردى جانە تۇراقتى تۇقىمدىق دەڭگەيىن دالەلدەدى.
قازاقستان كينولوگتار وداعى ءۇشىن تيتۋلدار مەن جەڭىستەر ماڭىزدى. الايدا باستى ناتيجە ودان دا كەڭ: قازاقى تازى حالىقارالىق كينولوگيادا تانىلا تۇسۋدە، ال قازاقستان تازىنىڭ شىققان ەلى جانە ونى ساقتاۋ، دامىتۋ ءارى ىلگەرىلەتۋ بويىنشا جۇيەلى جۇمىستىڭ ورتالىعى رەتىندەگى مارتەبەسىن ناقتى دالەلدەپ وتىر.
قازاقستاننىڭ World Dog Show 2026 كورمەسىنە قاتىسۋىنداعى ەرەكشە جارقىن ساتتەردىڭ ءبىرى قازاقى تازىنىڭ TOP Dog 2026 حالىقارالىق شوۋىنا شىعۋى بولدى.
TOP Dog — بۇل رينگتەگى كلاسسيكالىق ساراپتامالىق باعالاۋ ەمەس، كەڭ اۋديتورياعا، مەدياعا جانە الەمدىك كورمە قاۋىمداستىعىنا ارنالعان اسەرلى حالىقارالىق كورسەتىلىم. ءدال وسى الاڭدا تۇقىم تەك ماماندارعا عانا ەمەس، مىڭداعان كورەرمەنگە ءوز ەلىنىڭ مادەني بەينەسىنىڭ ءبىر بولىگى رەتىندە تانىستىرىلدى.
بۇل بەدەلدى الاڭدا قازاقستان العاش رەت ۇسىنىلدى. ارەنانىڭ باستى ەكرانىندا قازاقستان رەسپۋبليكاسىنىڭ مەملەكەتتىك تۋى كورسەتىلىپ، ەلىمىزدىڭ اتاۋى حالىقارالىق كينولوگيالىق قاۋىمداستىق الدىندا جاريالاندى.
قازاقستاندى ارەنادا استانادان كەلگەن قازاقى تازى داستەر, حەندلەر كاميباەۆا كارينا جانە قازاقستان كينولوگتار وداعىنىڭ پرەزيدەنتى سەرىكقالي باۋىرجانتانىستىردى.
بۇل جاي عانا كورمەلىك ەپيزود ەمەس، قازاقى تازىنىڭ شىققان ەلى رەتىندە قازاقستاندى الەمدىك كينولوگيانىڭ باستى الاڭدارىنىڭ بىرىندە سيمۆولدىق تۇردە تانىستىرۋ بولدى.
تازىنىڭ TOP Dog 2026 الاڭىنا شىعۋى قازاقستاننىڭ World Dog Show 2026 كورمەسىنە قاتىسۋىنىڭ ەموتسيونالدى شارىقتاۋ ساتىنە اينالدى. بۇل الاڭدا تازى وزىندىك بولمىسى بار، تانىمال ءارى جاھاندىق كينولوگيادا ءوز ورنىن الۋعا لايىق تۇقىم رەتىندە كورسەتىلدى.
ەسكە سالا كەتەيىك، قازاقى يت تۇقىمدارىن ساقتاۋ جانە دامىتۋ ماسەلەلەرى مەملەكەت باسشىسىنىڭ تاپسىرماسى بويىنشا جۇيەلى تۇردە دامىپ كەلەدى. 2023 جىلعى 3 قاڭتاردا وسى جۇمىستىڭ قۇقىقتىق نەگىزىن بەكىتكەن قازاقستان رەسپۋبليكاسىنىڭ قازاقى يت تۇقىمدارىن ساقتاۋ جانە ءوسىمىن مولايتۋ ماسەلەلەرى جونىندەگى زاڭى قابىلداندى.
2024 جىلعى 3 قىركۇيەكتە FCI «قازاقى تازى» تۇقىمىن الدىن الا نەگىزدە تانىپ، قازاقستانعا تۇقىمنىڭ شىققان ەلى مارتەبەسىن بەكىتتى. بەلگىلەنگەن كەزەڭ ىشىندە قازاقستان تۇقىمدى دامىتۋدى، تۇپكىلىكتى تانۋعا قاجەتتى اسىل تۇقىمدىق، كورمەلىك جانە وزگە دە دەرەكتەردى جيناۋدى جالعاستىرۋى قاجەت.
قازاقى تازىنىڭ بولونياداعى World Dog Show 2026 كورمەسىنە قاتىسۋى وسى جولداعى ماڭىزدى تاريحي قادامبولدى. بۇگىن سەنىممەن ايتۋعا بولادى: قازاقى تازى حالىقارالىق ارەناعا لايىقتى تۇردە شىعىپ، جاھاندىق كينولوگيادا ءوز ورنىن ايقىنداپ كەلەدى.
