بۇگىن، 10 ماۋسىمدا سەمەيدەگى امىرە قاشاۋباەۆ اتىنداعى مەملەكەتتىك فيلارمونيادا ءداستۇرلى ءانشى قايرات قابىشەۆ 100 ءاندى ۇزدىكسىز ورىندادى. بۇل تۋرالى اباي وبلىسىنىڭ وڭىرلىك كوممۋنيكاتسيا قىزمەتى جازدى، دەپ حابارلايدى «ادىرنا» ءتىلشىسى.
ونەر مارافونى ساعات 10:00-دە باستالعان. جوبا قورىتىندىسى بويىنشا قايرات قابىشەۆ 5 ساعات 29 مينۋت بويى ۇزدىكسىز ونەر كورسەتىپ، 102 ءداستۇرلى ءان ورىنداپ، بەلگىلەنگەن مەجەدەن اسقان.
«بۇل باستاما GBR (Global Best of Records) حالىقارالىق ۇيىمىنىڭ قاراۋىنا ۇسىنىلىپ، الەمدىك رەكورد رەتىندە تىركەۋگە ۇمىتكەر جوبا سانالادى. ونىڭ باستى ماقساتى – قازاقتىڭ ءداستۇرلى ءان ونەرىن حالىقارالىق دەڭگەيدە تانىتۋ جانە ۇلتتىق مۋزىكالىق مۇرانى كەڭىنەن دارىپتەۋ»،—دەلىنگەن حابارلامادا.
ەسكە سالساق، قايرات قابىشەۆتىڭ بۇل باستاماسى - قازاق ونەرى تاريحىنداعى ەرەكشە جوبالاردىڭ ءبىرى. مامانداردىڭ ايتۋىنشا، قۇرمانبەك جانداربەكوۆتەن كەيىن اراعا 101 جىل سالىپ، ءبىر ورىنداۋشىنىڭ 100 ءاندى ۇزدىكسىز ورىنداۋعا تالپىنىس جاساۋى العاش رەت قولعا الىندى.
رەكوردتىق كورسەتكىش حالىقارالىق تالاپتارعا سايكەس تاۋەلسىز ساراپشىلاردىڭ قاتىسۋىمەن ارنايى باقىلاۋدان ءوتتى. ساراپشىلار قۇرامىندا قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ كاۆالەرى، «دارىن» مەملەكەتتىك جاستار سىيلىعىنىڭ لاۋرەاتى، حالىقارالىق تۇركسوي ۇيىمىنىڭ «مۇراگەر» سىيلىعىنىڭ يەگەرى، فيلولوگيا عىلىمدارىنىڭ كانديداتى، ونەرتانۋ دوتسەنتى، فولكلورتانۋشى عالىم، ەپيك جىرشى بەرىك مىرزاليۇلى ءجۇسىپوۆ، قازاقستاننىڭ ەڭبەك سىڭىرگەن قايراتكەرى، تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ء«داستۇرلى مۋزىكالىق ونەر» كافەدراسىنىڭ پروفەسسورى نۇرجان قابيمولداۇلى جانپەيىسوۆ جانە قازاقستاننىڭ ەڭبەك سىڭىرگەن قايراتكەرى، قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى ەركىن تۇرسىنعاليۇلى شۇكىمان بولدى.
سونداي-اق ءىس-شاراعا «Global Best of Records» ۇيىمىنىڭ ازيا جانە افريكا رەكوردتار تىركەۋ ديۆيزيونىنىڭ باس وفيتسەرى قۋاندىق شىڭعىسۇلى قۇدايبەرگەن ارنايى قاتىسىپ، رەكوردتىق كورسەتكىشتى رەسمي تۇردە تىركەدى.
