الماتى قالاسى مۋزەيلەر بىرلەستىگىنە قاراستى س.مۇقانوۆ پەن ع.مۇسىرەپوۆتىڭ مۋزەي كەشەنىندە ۇلتتىق رۋحتى وياتىپ، قازاق مادەنيەتىن جاڭعىرتقان بىرەگەي تۇلعا، بەلگىلى ەتنوگراف-عالىم جانە قوعام قايراتكەرى وزبەكالى جانىبەكوۆتىڭ 95 جىلدىق مەرەيتويىنا ارنالعان «وزبەكالى جانە مۋزەي مادەنيەتى» اتتى دوڭگەلەك ۇستەل ءوتتى. بۇل شارا قايراتكەردىڭ وتاندىق مۋزەي ىسىنە قوسقان ولشەۋسىز ۇلەسىن ۇلىقتاۋدى ماقسات ەتتى.
رۋحاني كەشتى اقىن، حالىقارالىق «الاش» ادەبي سىيلىعىنىڭ لاۋرەاتى، مۋزەي كەشەنىنىڭ عىلىمي ءبولىم جەتەكشىسى ادىلعازى قايىربەكوۆ اشىپ، جۇرگىزىپ وتىردى. باسقوسۋعا اسىلدىڭ سىنىعى باۋىرجان وزبەكالىۇلى، نەمەرەلەرى ازەل مەن ءالىجان، تاريحشى-عالىم، «قۇرمەت»، «پاراسات» وردەندەرىنىڭ يەگەرى ەربولات اۋەزوۆ، جۋرناليست، ادەبي سىنشى، حالىقارالىق «الاش» ادەبي سىيلىعىنىڭ لاۋرەاتى ءامىرحان مەڭدەكە، «قۇرمەت» وردەنىنىڭ يەگەرى، احمەت بايتۇرسىنۇلى مۋزەي-ءۇيىنىڭ جەتەكشىسى، ء«تىل – قۇرال» وقۋ-ادىستەمەلىك، عىلىمي-زەرتتەۋ ورتالىعىنىڭ ديرەكتورى رايحان ساحىبەكقىزى، مادەنيەت سالاسىنىڭ ۇزدىگى، دومبىراشى، تاريحي «ادىرنا» ءانسامبلىنىڭ العاشقى تۇلەكتەرىنىڭ ءبىرى، قازىرگى تاڭدا «سازگەن سازى» فولكلورلىق-ەتنوگرافيالىق ءانسامبلىنىڭ ۇيىمداستىرۋشىسى تىلەك ۋرازاليەۆ قاتىستى. عالىمدار قايراتكەردىڭ وتاندىق مۋزەي ءىسى مەن قازاق رۋحانياتىنا قوسقان زور ەڭبەگىن جان-جاقتى تالقىلادى. تۇلعانىڭ قولونەر مەن سالت-ءداستۇردى ءتىرىلتۋ جولىنداعى تاريحي ەرلىگىن زور تەبىرەنىسپەن ەسكە الدى. اسىرەسە ونىڭ قوجا احمەت ياساۋي كەسەنەسى مەن وتىرار جادىگەرلەرىن امان ساقتاپ، حالىقارالىق مۋزەي دەڭگەيىنە كوتەرۋدەگى، سونداي-اق س. مۇقانوۆتىڭ مۋزەي-ءۇيىن اشۋداعى قاجىرلى ەڭبەگى ەرەكشە ايتىلدى. «سازگەن سازى» فولكلورلىق-ەتنوگرافيالىق ءانسامبلىنىڭ ارتيستەرى ءوز ونەرلەرىمەن كەش شىرايىن اشا ءتۇستى.
ءىس-شارا اياسىندا عالىمنىڭ عيبراتتى ءومىرى مەن ولشەۋسىز قىزمەتىنە، قۇندى عىلىمي ەڭبەكتەرىنە نەگىزدەلگەن «مادەنيەتتە ماڭگىلىك ءىز قالدىرعان تۇلعا» اتتى ارنايى كورمە ۇيىمداستىرىلدى. جينالعان قاۋىم تۇلعانىڭ قازاق رۋحانياتىن جاڭعىرتۋ جولىنداعى ەرەن ەڭبەكتەرى مەن ەل تاريحىنداعى وشپەس ءىزىن تاعى ءبىر مارتە ەسكە الدى.
ۇلتتىڭ ءبىرتۋار پەرزەنتىن ۇلىقتاعان بۇل شارا جانىبەكوۆ ەسىمىن ەل جادىندا ماڭگىلىككە قالدىرۋ جولىنداعى تاعى ءبىر ءساتتى قادام بولدى.
نازگۇل التاەۆا
راشيدا وتار
