زاپوروجە اەس-ءى ورنالاسقان ەنەرگودار قالاسىنىڭ اكىمى اەس ايماعىنداعى شايقاستاردىڭ توقتاعانىن جانە ءورت سوندىرىلگەنىن حابارلادى. بۇعان دەيىن اتوم ەلەكتر ستانتسياسىنا رەسەي اسكەرى بىرنەشە ساعات بويى وق جاۋدىرعان بولاتىن.
ۋكرايندىقتاردىڭ حابارلاۋىنشا، اكىمشىلىك وقۋ عيماراتىنىڭ ءۇشىنشى، ءتورتىنشى جانە بەسىنشى قاباتتارى ورتكە ورانعان. تەك تاڭعا جاقىن عانا ۋكراينانىڭ مەملەكەتتىك توتەنشە جاعدايلار قىزمەتىنىڭ قۇتقارۋشىلارى ءورتتىڭ تارالۋىن توقتاتىپ، 2 مىڭ شارشى مەتر اۋماقتى وقشاۋلادى. ال ءورت جەرگىلىكتى ۋاقىت بويىنشا تاڭعى 6:20-دا جويىلدى.
بۇعان دەيىن دميتري ورلوۆ جاقىن ماڭداعى زاپوروجە اتوم ەلەكتر ستانتسياسىنىڭ عيماراتتارى مەن بلوكتارى جۇماعا قاراعان ءتۇنى ۇزدىكسىز اتقىلاعانىن، سونىڭ سالدارىنان ەۋروپاداعى ەڭ ءىرى اتوم ەلەكتر ستانتسياسىندا ءورت شىققانىن ايتقان. ونىڭ ايتۋىنشا، اتوم ەلەكتر ستانتسياسىندا جارالانعاندار دا بار.
«رەسەي تانكتەرى قالاعا كىرىپ، اەس-ءتى باقىلاۋىنا الۋعا تىرىستى. الايدا ونىڭ قىزمەتكەرلەرى مەن جەرگىلىكتى تۇرعىندار رەسەي اسكەرىنىڭ جولىن جابۋ ءۇشىن اتوم ەلەكتر ستانتسياسى مەن وعان ىرگەلەس جولدارعا جينالدى”، -دەدى دميتري ورلوۆ
زاپوروجە اەس-ءى بەلگىلەنگەن قۋاتى بويىنشا ەۋروپاداعى ەڭ ءىرى اتوم ەلەكتر ستانتسياسى. ونىڭ التى VVER-1000 ەنەرگوبلوكتارى V-320 جوباسى بويىنشا سالىنعان. ءبىرىنشى ەنەرگوبلوك 1984 جىلى جەلتوقساندا، التىنشى بلوك 1995 جىلى قازاندا ىسكە قوسىلدى.
شامامەن، ءبىر اپتا بۇرىن رەسەي اسكەرلەرى جابىلعان چەرنوبىل اتوم ەلەكتر ستانتسياسىن باقىلاۋعا العان بولاتىن. ۋكراينا شەنەۋنىكتەرى سول كەزدە ايماقتاعى بىرقاتار جەرلەردە رادياتسيا دەڭگەيىنىڭ اسىپ كەتكەنىن حابارلادى. الايدا رەسەي بۇل اقپاراتتى جوققا شىعارىپ وتىر.
”ادىرنا” ۇلتتىق پورتالى
