قازاقستان ەڭ ارزان بەنزينى بار ەلدەردىڭ تىزىمىنە ەندى. ەلىمىزدە جانارماي قۇنى الەمدىك ورتاشا كورسەتكىشتەن ءۇش ەسەگە ارزان. بۇل تۋرالى “ادىرنا” ۇلتتىق پورتالى GlobalPetrolPrices سايتىنا سىلتەمە جاساپ حابارلايدى.
دۇنيە جۇزىندە بەنزيننىڭ ورتاشا باعاسى ليترىنە 1,32 دوللاردى قۇرايدى. ءارتۇرلى ەلدەر اراسىندا بەنزين باعاسىنىڭ ايتارلىقتاي ايىرماشىلىعى بار. پورتالدىڭ مالىمەتىنشە، ادەتتە باي ەلدەردە باعا جوعارى بولسا، كەدەي ەلدەر مەن مۇناي ءوندىرىپ، ەكسپورتتاۋشى ەلدەردە باعا ايتارلىقتاي تومەندەگەن. جالعىز ەرەكشەلىك اقش - بەنزيننىڭ سالىستىرمالى تۇردە تومەن قۇنى بار ەكونوميكالىق دامىعان ەل.
ءار ەلدەگى باعانىڭ ايىرماشىلىعى بەنزينگە سالىقتار مەن سۋبسيديالاردىڭ ءارتۇرلى بولۋىنا بايلانىستى. ماقالا اۆتورى بارلىق ەلدەر مۇنايدىڭ حالىقارالىق نارىقتا بىردەي قۇنىنا قول جەتكىزە الاتىنىن، بىراق ءارتۇرلى سالىق سالاتىنىن اتاپ ءوتتى. سونىڭ سالدارىنان بەنزين باعاسى دا وزگەرىپ وتىرادى.
ەڭ ارزان بەنزين، ساراپشىلاردىڭ پىكىرىنشە، ۆەنەسۋەلادا ساتىلادى جانە ءليترى $0,025 (شامامەن 12 تەڭگە) تۇرادى. ودان كەيىن ليۆيا، يران، سيريا، الجير، انگولا جانە كۋۆەيت تۇر.
ءبىر ءليترىنىڭ قۇنى 0,393 دوللاردى قۇرايتىن قازاقستان رەيتينگتە سەگىزىنشى ورىندا تۇر. بۇل ساراپشىلاردىڭ ەسەپتەۋىنشە، شامامەن 199 تەڭگە.
رەسەي 11-ءشى ورىندا. ونداعى جانارماي قۇنى $0,431, ياعني 218 تەڭگە. ساۋد ارابياسىندا (19-ورىن) بەنزين 0,621 دوللاردان (314 تەڭگە) ساتىلۋدا.
ساراپشىلاردىڭ پىكىرىنشە، ەڭ قىمبات بەنزين گونكونگتا $2,879 (1457 تەڭگە), موناكودا $2,477 (1253 تەڭگە) جانە نيدەرلاندىدا $2,432 (1230 تەڭگە) تۇرادى.
“ادىرنا» ۇلتتىق پورتالى
