بەرىك ابدىعاليۇلى تورعاي ءوڭىرىن دامىتۋ تۋرالى مەملەكەتتىك باعدارلاما قابىلداۋ كەرەك ەكەنىن اتاپ ءوتتى. بۇل جونىندە ءماجىلىس دەپۋتاتى Qasqa Jol Youtube ارناسىنا بەرگەن سۇحباتىندا ايتتى.
«تورعاي وڭىرىندەگى ادام سانى كۇرت ازايىپ كەتتى. ارقالىقتىڭ وزىندە 30 مىڭعا جۋىق قانا. مۇمكىن سونى ەسەپتەپ وبلىس ەتپەي جاتقان شىعار. بىراق وبلىس بولماسا دا تورعاي ءوڭىرىنىڭ دامۋىنا ارنايى مەملەكەتتىك باعدارلاما قابىلدانۋى كەرەك. ارقالىق قالاسى وتە توزىپ كەتتى. عيماراتتارى توزعان، حالىقتىڭ تابىسى ازايعان. جولدى رەتتەۋ كەرەك. ارقالىقتان تورعاي ارقىلى ىرعىز، اقتوبەگە كەتەتىن ۇلكەن تراسسا بولسا ەكەن دەيمىز. ونەركاسىپتى دە دامىتۋ قاجەت»، - دەدى بەرىك ابدىعاليۇلى.
دەپۋتات وسى ايتىلعاندار جۇزەگە اسقاننان كەيىن وبلىستى قايتا قۇرۋعا بولاتىنىن ايتادى.
«ەگەر بولاشاقتا ەكونوميكاسى رەتتەلىپ، زاۋىتتار قايتا سوعىلىپ، ادام سانى كوبەيىپ جاتسا تورعاي وبلىسىنىڭ دا اشىلۋ كەزەگى كەلەدى. ارقالىقتا وبلىستىق ينفراقۇرىلىم جاقسى ساقتالىپ تۇر. ورتالىق بولا الادى»،- دەپ پىكىر ءبىلدىردى ول.
ەسكە سالساق، پرەزيدەنت توقاەۆ 16 ناۋرىزداعى حالىققا جولداۋىندا ۇلىتاۋ، جەتىسۋ، اباي وبلىستارى قۇرىلاتىنىن مالىمدەگەن. ودان كەيىن كوپشىلىك تورعاي وبلىسىن قۇرۋ جونىندە دە ۇسىنىستار ايتا باستادى.
باعدارلامانى تومەندەگى سىلتەمە ارقىلى تولىق كورە الاسىز:
“ادىرنا” ۇلتتىق پورتالى
