26 ناۋرىزدا ساعات 21.30-دا پەتروپاۆلداعى جەو-2-دە تاعى دا اپات بولدى، - دەپ حابارلايدى "ادىرنا" ۇلتتىق پورتالىنىڭ ءتىلشىسى. اقپاراتتى كاسىپورىننىڭ ءباسپاسوز قىزمەتى راستادى.
"قازىر كاسىپورىندا ەكى قازاندىق پەن ەكى تۋربينا بار. جەلىلىك سۋدىڭ تەمپەراتۋراسى 43-37 گرادۋس تسەلسي", - دەپ حابارلادى پەتروپاۆل اكىمدىگى.
كومپانيا تۇسىندىرگەندەي، جەو-2-دە بارلىعى 12 قازاندىق ورناتىلدى: بىرەۋى تولىعىمەن اۋىستىرۋعا دايىندالىپ جاتقاندىقتان، بولشەكتەلدى. بيىلعى قىستا ورتا ەسەپپەن 7-8 قازاندىق جۇمىس ىستەدى، مۇرجانىڭ ءبىر بولىگى وپىرىلعاننان كەيىن ءبىرىنشى كەزەكتەگى قازاندىقتار توقتاپ، بەسەۋى جۇمىس ىستەپ تۇردى»، - دەيدى «سەۆكازەنەرگو» اق ءباسپاسوز حاتشىسى ليليا شەرينا.
سونداي-اق ولار جەو-2-دە جوندەۋ-قالپىنا كەلتىرۋ جۇمىستارى جۇرگىزىلىپ جاتقانىن قوسا ايتتى. ولاردىڭ قانشا ۋاقىتقا سوزىلاتىنى ازىرگە بەلگىسىز.
ەسكە سالايىق، 20 ناۋرىزدا پەتروپاۆل قالاسىنداعى جەو-2-دە ءبىر مۇرجا وپىرىلىپ تۇسكەن بولاتىن. وقيعادان كەيىن ءبىر تاۋلىكتەن استام ۋاقىت وتكەن سوڭ قۇتقارۋشىلار كاسىپورىننىڭ مامانىن ىزدەستىردى. 22 ناۋرىزدا ءۇيىندى استىنان 38 جاسار جۇمىسشىنىڭ دەنەسى تابىلدى. پروكۋراتۋرا وقيعاعا قاتىستى تەرگەۋدى جالعاستىرۋدا. 22 ناۋرىزدا «جەو-2» جشس ديرەكتورى مەن كاسىپورىننىڭ باس ينجەنەرى ۇستالىپ، پەتروپاۆل قالالىق ءىىب ۋاقىتشا ۇستاۋ يزولياتورىنا قامالدى.
وبلىس ورتالىعىنداعى جەو-2 60 جىلدان استام جۇمىس ىستەپ كەلەدى. 2021 جىلدىڭ قاراشا جانە جەلتوقسان ايلارىندا كاسىپورىندا ەكى رەت وقىس وقيعا ورىن الدى. ەكەۋىندە ەكى قازاندىق ىستەن شىقتى. ودان كەيىن قالانىڭ بىرنەشە اۋدانى جارىقسىز قالدى.
"ادىرنا" ۇلتتىق پورتالى
