سدۋ ستۋدەنتتەرى مۇمكىندىگى شەكتەۋلى وقۋشىلارعا ارنالعان قۇرىلعىلار ويلاپ تاپتى

1998
Adyrna.kz Telegram

سۋلەيمان دەميرەل اتىنداعى ۋنيۆەرسيتەت ستۋدەنتتەرى قر ءبىلىم جانە عىلىم مينيسترلىگى ۇيىمداستىرعان «BILIM Hackathon 2022» IT بايقاۋىندا ءۇشىنشى ورىندى يەلەندى. بىلىمگەرلەر جارىستا مۇمكىندىگى شەكتەۋلى وقۋشىلارعا ارنالعان جوبالارىن ۇسىندى، دەپ جازادى "ادىرنا" ۇلتتىق پورتالى. 

سايىسقا قاتىسۋشىلارعا ءتۇرلى تاپسىرمالار بەرىلدى. ستۋدەنتتەر ەركىن تاقىرىپتا دا، بەرىلگەن تاقىرىپ بويىنشا دا ءبىلىم بەرۋ سالاسىنداعى تسيفرلىق شەشىمدەر بويىنشا جوبا دايىندادى. قازىلار القاسىنىڭ شەشىمىمەن جۇلدەلى ءۇشىنشى ورىن سدۋ ستۋدەنتتەرىنىڭ كومانداسىنا بۇيىردى.

ولاردىڭ جوباسى مۇمكىندىگى شەكتەۋلى وقۋشىلار مەن ستۋدەنتتەرگە ارنالعان. 2 كۋرس ستۋدەنتى قاجىمۇقان رەيمباەۆتىڭ ايتۋىنشا، ولار تىڭ يەديانى 24 ساعاتتا ويلاپ تاپقان.

«جارىستا ۇسىنعان جوبامىز مۇمكىندىگى شەكتەۋلى جاندارعا ارنالعان. مەكتەپ وقۋشىلارى ارنايى قولعاپتى كيىپ، ىم-يشارا ارقىلى ويىن جەتكىزەدى. ءبىز ويلاپ تاپقان قۇرىلعى ولاردىڭ ويىن تۇسىنىكتى تىلگە اينالدىرىپ بەرەدى. تاعى ءبىر يدەيامىز زاعيپ جاندارعا ارنالعان. وقۋشىلار مەن ستۋدەنتتەر ءۇشىن وقۋلىقتاعى ارىپتەردى برايل شريفتىنە اينالدىراتىن قۇرىلعى مەن قوسىمشا ويلاپ تاپتىق. بۇل جوبالاردى ويلاپ تابۋ ءۇشىن بىزگە 24 ساعات ۋاقىت بەرىلدى. جارىستا 72 كوماندانىڭ ىشىندە ءىىى ورىن الىپ، 500 مىڭ تەڭگە ۇتىپ الدىق. الداعى ۋاقىتتا بۇل جوبالارىمىزعا جۇزەگە اسىرامىز»، – دەدى اقپاراتتىق جۇيەلەر ماماندىعىنىڭ ستۋدەنتى.

2022 جىلدىڭ 26-27 ناۋرىزىندا وتكەن cايىستىڭ جەڭىمپازدارىن ءبىلىم جانە عىلىم ءمينيسترى اسحات ايماعامبەتوۆ ماراپاتتادى. جارىسقا قاتىسۋعا ەلىمىزدىڭ بارلىق وڭىرىنەن 107 كوماندا ءوتىنىش بەردى. 230 ستۋدەنتتەن قۇرالعان 72 كوماندا فينالعا جولداما الدى. جۇلدە قورى 3,5 ميلليون تەڭگەنى قۇرادى. جەڭىمپاز ستۋدەنتتەر اقشالاي سىيلىقتارمەن قوسا، Daryn online, BTS Education, EDUS جانە Mail.kz جانە باسقا دا قازاقستاندىق IT-كومپانيالاردا جۇمىسقا ورنالاسۋ مۇمكىندىگىنە يە بولدى.

بايقاۋ ءبىلىم مەن عىلىم سالاسىندا جاڭا IT جوبالاردى جاساۋعا باستاماشىلىق ەتۋ، IT مامانداردى ىنتالاندىرۋ ماقساتىندا ۇيىمداستىرىلدى.

"ادىرنا" ۇلتتىق پورتالى 

 

 

پىكىرلەر