شىمكەنتتە 100 ميلليونعا سالىنعان ۆەلوجول قىزۋ تالقىعا تۇسۋدە. ويتكەنى، پايدالانۋعا بەرىلگەننەن كەيىن التى اي وتكەن سوڭ ۇگىتىلىپ قالعان، دەپ حابارلايدى “ادىرنا” ۇلتتىق پورتالى كتك تەلەارناسىنا سىلتەمە جاساپ.
ءتىپتى، جەرگىلىكتى تۇرعىندار جاڭا سپورت جولىن «جاۋىنگەرلىك الاڭ» دەپ اتاپ كەتىپتى.
كتك ارناسىنىڭ حابارلاۋىنشا، بۇل جولمەن ۆەلوسيپەدتەرگە عانا ەمەس، جاياۋ جۇرگىنشىگە دە ءجۇرۋ قاۋىپتى. 700 مەترگە جۋىق جەر ۇگىتىلىپ قالعان.
ۆەلوجول جاڭبىردىڭ سۋىنا توتەپ بەرە الماسا كەرەك. كورشى ىقشاماۋدانعا كارىز جۇرگىزىپ جاتقان قۇرىلىس كومپانياسى اسفالت استىنداعى بوس جەرلەردى جابۋعا تىرىسپاعان دا. ال ەندى ولار بارلىعىن ءوز قاراجاتىنا قالپىنا كەلتىرۋى كەرەك.
«قازىر ۇگىتىلىپ قالعان جەرلەر رەتتەلىپ جاتىر. تاعى دا ءبارى دەمونتاجدالىپ، نىعىزدالادى. مۇنىمەن كارىز جەلىلەرىن جۇرگىزگەن «ەنساف» سەرىكتەستىگى اينالىسادى. بارلىق جۇمىستار سولاردىڭ ەسەبىنەن جۇرگىزىلەتىن بولادى. سپورت جولىن سالعان «بەرەكە» سەرىكتەستىگى ەشقانداي جاۋاپكەرشىلىك كوتەرمەيدى. بارلىعى «ەنسافتىڭ» كىناسىنەن بولدى، ونى قالپىنا كەلتىرۋى كەرەك» دەدى شىمكەنت قالاسى اكىمىنىڭ ورىنباسارى ماقسۇت يساحوۆ.
”ادىرنا” ۇلتتىق پورتالى
