ءتيىستى قۇقىقتىق-نورماتيۆتىك اكتىلەر بويىنشا اۋەجايدىڭ سانيتارلىق قورعاۋ ايماعى 100 مەترگە دەيىنگى قاشىقتىقتى الىپ جاتۋى شارت. وعان اۋەجاي ماڭىنداعى 139 گەكتار جەر كىرەدى، دەپ حابارلايدى «ادىرنا» ۇلتتىق پورتالى شىمكەنت قالاسىنىڭ اكىمى عابيت سىزدىقبەكوۆتىڭ ينستاگرام پاراقشاسىنا سىلتەمە جاساپ.
«سونىمەن قاتار اتالعان ايماقتاعى 307 جەر تەلىمىندە تۇرعىن ۇيلەر ورنالاسقان.
اتالعان ماسەلەنى شەشۋ ماقساتىندا، 307 جەر تەلىمىن مەملەكەت مۇقتاجىنا قايتارىپ الۋ جونىندە قاۋلى قابىلدانعان بولاتىن.
الايدا، باعالاۋ جۇمىستارى بۇل ماقساتقا 30 ميلليارد تەڭگە قاجەت ەكەنىن كورسەتتى.
ناتيجەسىندە، مەملەكەت مۇقتاجىنا قايتارىپ الۋدىڭ قالا بيۋدجەتىنە سالماق تۇسىرەتىنى انىقتالدى. سول سەبەپتى، شىمكەنت اۋەجايىنا سانيتارلىق قاۋىپسىزدىكتى قامتاماسىز ەتەتىن قاشىقتىقتان جاڭا ۇشۋ-قونۋ جولاعىن سالۋ تۋرالى شەشىم قابىلداندى. وسىعان وراي، جوبالىق-سمەتالىق قۇجاتتاردى ازىرلەۋ ءۇشىن «Qazaq City Stroy» جشس-ىمەن مەموراندۋم ءتۇزىلدى.
اۋەجايداعى جاڭا ۇشۋ-قونۋ جولاعىنىڭ ۇزىندىعى — 3 300 مەتر، ال، ەنى — 45 مەتر بولادى. ناتيجەسىندە، حالىقتىڭ باسپاناسى بۇزىلمايدى. مەملەكەت قارجىسى دا ۇنەمدەلىپ، اۋەجاي زاماناۋي ۇشىپ-قونۋ جولاعىنا يە بولادى»، - دەدى اكىم.
