اقتاۋدا كوشە سىپىرۋشىلار نارازىلىققا شىقتى. 500-گە جۋىق كوممۋنالدىق مەكەمە جۇمىسشىلارى جالاقى كوتەرۋدى تالاپ ەتۋدە. ءتىپتى جانايقايىن جەتكىزۋ ءۇشىن جولدى جاۋىپ تاستادى. بۇل تۋرالى كتك تەلەارناسى مالىمدەدى، دەپ حابارلايدى “ادىرنا” ۇلتتىق پورتالى.
«ءبارىنىڭ ءۇيى جوق. تاڭعى ساعات 5تە شىعىپ، ۇيىنە كەشكى 8-دە قايتادى. ءبارى ايەلدەر. وسى جەردەگى ەركەكتەر دايىن تاماق پەن دايىن توسەككە بارعانى بولماسا. باسىندا ەرەۋىلگە شىعامىز دەپ ويلامادىق. اينالعاندا تەندەردىڭ ماسەلەسى كۇشەيىپ كەتكەننەن كەيىن، سول سەبەپتى وسىندايعا كەلدىك …»، – دەيدى تازالىقشىلار.
كۇن ۇزاققا كوشە سىپىرىپ قالانىڭ قوقىسىن شىعاراتىندار ءالى كۇنگە ناۋرىز ايىنىڭ جالاقىسىن الماپتى. ەكى جىلدان بەرى ەڭبەك دەمالىسىنا دا شىقپاعان. سوندىقتان جولدى جابۋعا دەيىن بارعان جۇمىسشىلار ايلىقتى 30 پايىزعا ءوسىرۋدى تالاپ ەتتى. ال قالا تازالاعىنا جاۋاپتى مەكەمە باسشىلارى كوشە سىپىرۋشىلاردىڭ اقشاسىن جىل سايىن 10 پايىزعا كوتەرىپ جاتىرمىز دەپ اقتالدى.
ماسەلەن، بىلتىر 67 مىڭ تەڭگەدەن 83 مىڭعا كوبەيىپتى. ال بيىل 90 مىڭ تەڭگەگە جەتتى دەيدى. الداعى ۋاقىتتا تاعى 6 مىڭ تەڭگەدەن قوسىلادى دەپ جوسپارلاعان. بىراق بيىل تەندەر توقتاپ قالىپ، قارجى قولبايلاۋ بولىپ وتىر دەيدى.
«ءبىز مەملەكەتتىك ساتىپ الۋ كونكۋرسىن وتكىزدىك اقتاۋ قالاسى اكىمدىگى، ءۇش جىلعا. مەملەكەتتىك ساتىپ الۋ كونكۋرسى بويىنشا بىرنەشە مەكەمە قاتىسىپ، جەڭىمپاز انىقتالدى. بىراق مەملەكەتتىك اۋديت مەكەمەسى تەكسەرىپ، ءبىرىنشى كونكۋرستىڭ قورىتىندىسىن بۇزىپ تاستادى. كەيىن قايتالاپ شىعارعان بولاتىنبىز. قازىر جەڭىمپاز انىقتالدى. سونىمەن قاتار قاتىسقان ءۇشىنشى مەكەمە ارىز جازۋىنا بايلانىستى توقتاپ تۇر. سول سەبەپتەن ءبىز قالا اكىمدىگى مىنا مەكەمەگە ءتيىستى قاراجاتتى تولەي الماي وتىر»، – دەيدى اقتاۋ قالاسى اكىمىنىڭ ورىنباسارى الپىسباي تاۋباەۆ.
