تۇركىستان وبلىسىنداعى تاس جولدا رەسەيدەن تاجىكستانعا بەت العان اۋىر جۇك كولىگى ورتەنىپ كەتتى، - دەپ حابارلايدى "ادىرنا" ءتىلشىسى تۇركىستان وبلىسى اكىمدىگىنىڭ ءباسپاسوز قىزمەتىنە سىلتەمە جاساپ.
وقيعا 2022 جىلدىڭ 9 ساۋىرىندە تۇنگى ساعات 21.00 شاماسىندا بولعانى حابارلاندى. اۋداندىق ىشكى ىستەر ءبولىمىنىڭ 102 پۋلتىنە سامارا-شىمكەنت تاس جولىنىڭ 73-ءشى شاقىرىمىندا جيەنقۇم اۋىلى تۇسىندا جۇك كولىگى ورتەنىپ جاتقانى تۋرالى حابارلاما تۇسكەن.
"اۋداندىق ءبولىمنىڭ جەدەل-تەرگەۋ توبى دەرەۋ وقيعا ورنىنا اتتاندى. ءتارتىپ ساقشىلارى جان-جاقتى تەكسەرە كەلە، رەسەيدەن تاجىكستانعا بەت العان Volvo جۇك كولىگىنىڭ جانىنان تىركەمە تسيليندر ورتەنگەنىن انىقتادى", - دەپ حابارلادى وبلىستىق پوليتسيا.
وزدىگىنەن جانۋ سالدارىنان اۋىر جۇك كولىگى تۇرمىستىق تەحنيكامەن بىرگە تولىعىمەن جانىپ كەتكەنى اتاپ ءوتىلدى. ماتەريالدىق شىعىننان باسقا زارداپ شەككەندەر جوق. جۇرگىزۋشى جۇك كولىگىن قۇجاتتارىمەن بىرگە تاستاپ ۇلگەرگەن.
ءورت ءسوندىرىلدى. جول تازارتىلىپ، كولىك قوزعالىسى اشىلدى.
بۇل دەرەك بايدىبەك روپ-تا تىركەلدى. پوليتسيا وقيعانىڭ بارلىق ءمان-جايىن انىقتاپ جاتىر.
