فوتو: يليا موسكوۆەتس/URA.RU/تاسس
ەكى دۇركىن وليمپيادا چەمپيونى، مانەرلەپ سىرعاناۋشى ەۆگەني پليۋششەنكو ۇلى الەكساندردىڭ سپورتتىق ازاماتتىعىن رەسەيدەن ازەربايجانعا اۋىستىرۋىنا رەسەيدە سپورتشى رەتىندە دامۋىنا مۇمكىندىك بولماعانى سەبەپ بولعانىن ايتتى. بۇل تۋرالى ول Lotus Media-عا بەرگەن سۇحباتىندا مالىمدەدى، دەپ حابارلايدى "ادىرنا".
«قازىر ءبىز ازەربايجانعا بارا جاتىرمىز. وندا وقۋ-جاتتىعۋ جيىنىن وتكىزەمىز، ەكى اپتا بويى جاتتىعامىز. ءبىز ءارى رەسەيدە، ءارى ازەربايجاندا دايىندالامىز. ۇلىمنىڭ مۇمكىندىگى وتە جوعارى. مەن ونىڭ جارىستارعا قاتىسا باستاعانىن قالايمىن. رەسەيدە ول ەشكىمگە كەرەك بولمادى. اشىق ايتايىقشى، ءبارى ونىڭ ءبىزدىڭ رەسەيلىك سپورتشىلار دەڭگەيىنە جەتە المايتىنىن ايتتى. ەگەر ونىڭ اتى-ءجونى جاي عانا يۆان يۆانوۆ بولعاندا، وعان ەشكىم نازار اۋدارماس ەدى»، — دەدى پليۋششەنكو.
ونىڭ ايتۋىنشا، الەكساندر حالىقارالىق ارەنادا ونەر كورسەتۋى كەرەك، ال رەسەيدەگى قازىرگى جاعداي سپورتشىلاردىڭ دامۋىنا كەرى اسەرىن تيگىزىپ وتىر.
«وعان الەمدىك دەڭگەيدە ونەر كورسەتۋ قاجەت. ويتكەنى، شىنىن ايتسام، بىزدە قازىر قۇلدىراۋ ءجۇرىپ جاتىر. كيروۆقا، پەرمگە، ەكاتەرينبۋرگكە نەمەسە ماسكەۋ وبلىسىنا بارىپ جارىسۋ، ارينە، جاقسى. بىراق بۇل ءبىزدىڭ سپورتشىلار ءۇشىن دامۋ ەمەس، كەرىسىنشە كەرى كەتۋ»، — دەدى ول.
سونداي-اق پليۋششەنكو حالىقارالىق كونكيشىلەر وداعىنىڭ (ISU) رەسەيلىك سپورتشىلاردى بەيتاراپ مارتەبەمەن جارىستارعا قاتىستىرۋ تۋرالى شەشىمىنە دە پىكىر ءبىلدىردى.
«ازىرگە ءار باعدارلاما بويىنشا ءبىر عانا سپورتشى جىبەرىلسە دە، ەرەسەكتەرىمىز گران-پري كەزەڭدەرىنە قاتىستىرىلماسا دا، بۇل — العا جاسالعان قادام. ۋاقىت وتە كەلە ءوسىم قايتا باستالادى، ءبىز حالىقارالىق ارەناعا قايتا ورالىپ، جوعارى ناتيجەلەرگە قول جەتكىزەمىز»، — دەدى ول.
13 جاستاعى الەكساندر پليۋششەنكونىڭ، بالا كەزىنەن «گنوم گنومىچ» دەگەن لاقاپ اتپەن تانىلعان سپورتشىنىڭ، ازەربايجان قۇراماسى اتىنان ونەر كورسەتەتىنى مامىر ايىندا بەلگىلى بولدى. پليۋششەنكونىڭ ايتۋىنشا، ۇلى وسى ەلدىڭ سپورتتىق ازاماتتىعىن بەس جىل مەرزىمگە العان. وليمپيادا چەمپيونى الەكساندردىڭ رەسەي قۇراماسىنىڭ مۇشەسى بولماعانىن جانە «ەشكىمنىڭ ورنىن تارتىپ الماعانىن» اتاپ ءوتتى. كۇتىلىپ وتىرعانداي، جاڭا ماۋسىمدا ول قىركۇيەك ايىندا تۇركيا مەن گرۋزيادا وتەتىن جاسوسپىرىمدەر اراسىنداعى گران-پري كەزەڭدەرىنە قاتىسادى.
رەسەيدە الەكساندر پليۋششەنكو ءبىرىنشى سپورتتىق رازرياد بويىنشا ونەر كورسەتىپ، ەلدەگى ەڭ ءىرى جارىستارعا سيرەك قاتىستى. ول اكەسىنىڭ «انگەلى پليۋششەنكو» اتتى جەكە اكادەمياسىندا جاتتىعىپ، ونىڭ مۇز شوۋلارىنا قاتىسىپ ءجۇردى.
ايتا كەتەيىك، 2022 جىلى ەۆگەني پليۋششەنكو «رب سپورت» باسىلىمىنا بەرگەن سۇحباتىندا شاكىرتتەرىنىڭ بارلىعى رەسەي اتىنان ونەر كورسەتۋدى تاڭداعانىن، ال ەگەر ولاردىڭ ءبىرى سپورتتىق ازاماتتىعىن اۋىستىرعىسى كەلسە، ونى بۇل شەشىمىنەن اينىتۋعا تىرىساتىنىن ايتقان بولاتىن.
