ءبىلىم جانە عىلىم مينيسترلىگى جانىنان 70-تەن استام ستۋدەنتتەن تۇراتىن ستۋدەنتتىك كەڭەس قۇرىلدى. بۇل جايىندا مينيستر اسحات ايماعامبەتوۆ ءوزىنىڭ فەيسبۋك پاراقشاسىندا حابارلادى، دەپ جازادى "ادىرنا" ۇلتتىق پورتالى.
"ەلىمىزدىڭ بارلىق ءوڭىرىنىڭ ستۋدەنتتەرىمەن، ستۋدەنتتىك پارلامەنتتەرىنىڭ، جاستار ءىسى جونىندەگى كوميتەتتەرىنىڭ وكىلدەرىمەن جانە جوو-نىڭ پرورەكتورلارىمەن كەزدەستىم. «ەركىن ميكروفون» فورماتىندا ستۋدەنتتەر ءوز سۇراقتارىن اشىق قويىپ، ويلارى مەن ۇسىنىستارىن ورتاعا سالدى. سونىڭ نەگىزىندە قۇرىلىمدىلىق بولىمدەرگە ءتيىستى تاپسىرمالار بەرىلدى", - دەپ جازدى مينيستر.
نەگىزگى باعىتتاردى قىسقاشا اتاپ وتكىم كەلەدى.
1. ستۋدەنتكە باعىتتالعان وقىتۋ – جوعارى ءبىلىم بەرۋ جۇيەسىنىڭ باسىم باعىتتارىنىڭ ءبىرى. جوو باسشىلىعى ستۋدەنتتەردىڭ باستامالارىن قولداۋى كەرەك. ستۋدەنتتەر ۇسىنعان قىزىقتى جوبالاردى ۋنيۆەرسيتەتتەر مۇمكىندىگىنە قاراي قولداۋى قاجەت، اسىرەسە قارجىلاي قولداۋ.
2. ستۋدەنتتىك ءوزىن-ءوزى باسقارۋ. ءاربىر ۋنيۆەرسيتەتتە ستۋدەنتتىك پارلامەنتتەر قۇرىلۋى كەرەك. مۇنداي ۇيىمدار ستۋدەنتتەردىڭ ساياسي جانە قۇقىقتىق مادەنيەتىن دامىتادى. بۇل پارلامەنتتەردىڭ فورماليزم ءۇشىن عانا جۇمىس ىستەمەۋى ماڭىزدى. ستۋدەنتتىك پارلامەنتتىڭ مۇشەلەرىن ستۋدەنتتەردىڭ وزدەرى سايلاۋى كەرەك. ال سايلانعان وكىلدەرگە ماسەلەلەردى شەشۋ ءۇشىن بەلگىلى ءبىر مۇمكىندىكتەر ۇسىنىلۋى قاجەت. مىسالى، ولار بوس گرانتتاردى نەمەسە پرەزيدەنتتىك ستيپەنديانى جانە ت.ب. جۇمىستى كەلىسە الار ەدى. وسى جانە باسقا دا ماسەلەلەردى ستۋدەنتتىك پارلامەنتپەن كەلىسىپ قابىلداناتىن شەشىمدەردىڭ اشىقتىعى مەن زاڭدىلىعىن قامتاماسىز ەتۋگە مۇمكىندىك بەرەدى.
3. ۆولونتەرلىك. قوعامدىق ماڭىزى بار ءىس-شارامەن اينالىساتىن بەلسەندى ستۋدەنتتەردىڭ سانىن كوبەيتۋ ءۇشىن ءارتۇرلى ىنتالاندىرۋ تەتىكتەرى بار. مىسالى، ەندى 20 ساعاتتىق ۆولونتەرلىك قىزمەت ءۇشىن ستۋدەنتتەرگە ۆاۋچەر تۇرىندە نەسيە بەرىلەدى. سونداي-اق ولار 20 000 تەڭگە مولشەرىندە بىرجولعى اقشالاي تولەم الا الادى. ەگەر ستۋدەنت 50 ساعات جۇمىس ىستەسە، وندا وعان بەس اكادەميالىق كرەديت (ساعات) ەسەپتەلىپ، 50 000 تەڭگە تولەنەدى. بىراق بۇل ىنتالاندىرۋ شارالارى ەكەنىن ءتۇسىنۋ ماڭىزدى. بۇكىل الەمدە ۆولونتەرلىك ەرىكتى نەگىزىندە جۇزەگە اسىرىلادى.
4. دەبات قوزعالىسى. ءبىز دەبات قوزعالىسىن بەلسەندى تۇردە دامىتىپ جاتىرمىز. ولار فاكۋلتەتتەردەن باستاپ، ەل اۋقىمىنا دەيىنگى بارلىق دەڭگەيدە جۇرگىزىلۋى كەرەك. ءوزىم دە بۇرىنعى دەباتشى ستۋدەنت رەتىندە قازىرگى ستۋدەنتتەردى دەبات قوزعالىسىنا بەلسەندى قاتىسۋعا شاقىرامىن.
5. ستۋدەنتتىك سپورت. وكىنىشكە قاراي، ءالى بارلىق ۋنيۆەرسيتەت ستۋدەنتتەردى قاجەتتى ينفراقۇرىلىممەن قامتاماسىز ەتكەن جوق. سپورت زالدارى ستۋدەنتتەرگە قولجەتىمدى بولۋى كەرەك. سونىمەن قاتار ستۋدەنتتىك سپورت ليگالارىن دا دامىتۋ قاجەت.
6. سونداي-اق ءبىز الەۋمەتتىك GPA ەنگىزۋ، «جايدارمان» قوزعالىسىن دامىتۋ، جاستار ءىسى جونىندەگى كوميتەتتەردىڭ جۇمىسى، رەكتورلاردىڭ ستۋدەنتتەرمەن توقسان سايىنعى كەزدەسۋى جانە ت.ب. ماسەلەلەردى تالقىلادىق.
قورىتىندىلاي كەلە، ءبىز مينيسترلىك جانىنان 70-تەن استام ستۋدەنتتەن تۇراتىن ستۋدەنتتىك كەڭەس قۇرعانىمىزدى اتاپ وتكىم كەلەدى. ءارى قاراي دا توقسان سايىن ستۋدەنتتەرمەن كەزدەسىپ، ايتىلعان ۇسىنىستار بويىنشا بىرلەسىپ جۇمىس ىستەيمىز", - دەپ جازدى اسحات ايماعامبەتوۆ.
"ادىرنا" ۇلتتىق پورتالى
