Bılım jäne ǧylym ministrlıgı janynan 70-ten astam studentten tūratyn studenttık keŋes qūryldy. Būl jaiynda ministr Ashat Aimaǧambetov özınıŋ feisbuk paraqşasynda habarlady, dep jazady "Adyrna" ūlttyq portaly.
"Elımızdıŋ barlyq öŋırınıŋ studentterımen, Studenttık parlamentterınıŋ, Jastar ısı jönındegı komitetterınıŋ ökılderımen jäne JOO-nyŋ prorektorlarymen kezdestım. «Erkın mikrofon» formatynda studentter öz sūraqtaryn aşyq qoiyp, oilary men ūsynystaryn ortaǧa saldy. Sonyŋ negızınde qūrylymdylyq bölımderge tiıstı tapsyrmalar berıldı", - dep jazdy ministr.
Negızgı baǧyttardy qysqaşa atap ötkım keledı.
1. Studentke baǧyttalǧan oqytu – joǧary bılım beru jüiesınıŋ basym baǧyttarynyŋ bırı. JOO basşylyǧy studentterdıŋ bastamalaryn qoldauy kerek. Studentter ūsynǧan qyzyqty jobalardy universitetter mümkındıgıne qarai qoldauy qajet, äsırese qarjylai qoldau.
2. Studenttık özın-özı basqaru. Ärbır universitette studenttık parlamentter qūryluy kerek. Mūndai ūiymdar studentterdıŋ saiasi jäne qūqyqtyq mädenietın damytady. Būl parlamentterdıŋ formalizm üşın ǧana jūmys ıstemeuı maŋyzdy. Studenttık parlamenttıŋ müşelerın studentterdıŋ özderı sailauy kerek. Al sailanǧan ökılderge mäselelerdı şeşu üşın belgılı bır mümkındıkter ūsynyluy qajet. Mysaly, olar bos granttardy nemese Prezidenttık stipendiiany jäne t.b. jūmysty kelıse alar edı. Osy jäne basqa da mäselelerdı Studenttık parlamentpen kelısıp qabyldanatyn şeşımderdıŋ aşyqtyǧy men zaŋdylyǧyn qamtamasyz etuge mümkındık beredı.
3. Volonterlık. Qoǧamdyq maŋyzy bar ıs-şaramen ainalysatyn belsendı studentterdıŋ sanyn köbeitu üşın ärtürlı yntalandyru tetıkterı bar. Mysaly, endı 20 saǧattyq volonterlık qyzmet üşın studentterge vaucher türınde nesie berıledı. Sondai-aq olar 20 000 teŋge mölşerınde bırjolǧy aqşalai tölem ala alady. Eger student 50 saǧat jūmys ıstese, onda oǧan bes akademiialyq kredit (saǧat) eseptelıp, 50 000 teŋge tölenedı. Bıraq būl yntalandyru şaralary ekenın tüsınu maŋyzdy. Bükıl älemde volonterlık erıktı negızınde jüzege asyrylady.
4. Debat qozǧalysy. Bız debat qozǧalysyn belsendı türde damytyp jatyrmyz. Olar fakultetterden bastap, el auqymyna deiıngı barlyq deŋgeide jürgızıluı kerek. Özım de būrynǧy debatşy student retınde qazırgı studentterdı debat qozǧalysyna belsendı qatysuǧa şaqyramyn.
5. Studenttık sport. Ökınışke qarai, älı barlyq universitet studentterdı qajettı infraqūrylymmen qamtamasyz etken joq. Sport zaldary studentterge qoljetımdı boluy kerek. Sonymen qatar studenttık sport ligalaryn da damytu qajet.
6. Sondai-aq bız äleumettık GPA engızu, «Jaidarman» qozǧalysyn damytu, Jastar ısı jönındegı komitetterdıŋ jūmysy, rektorlardyŋ studenttermen toqsan saiynǧy kezdesuı jäne t.b. mäselelerdı talqyladyq.
Qorytyndylai kele, bız ministrlık janynan 70-ten astam studentten tūratyn studenttık keŋes qūrǧanymyzdy atap ötkım keledı. Ärı qarai da toqsan saiyn studenttermen kezdesıp, aitylǧan ūsynystar boiynşa bırlesıp jūmys ısteimız", - dep jazdy Ashat Aimaǧambetov.
"Adyrna" ūlttyq portaly
