Su resurstary jäne irrigasiia ministrı Nūrjan Nūrjıgıtov Almaty qalasyndaǧy №79 gimnaziianyŋ oquşysy Dana Qadyrbekpen kezdesıp, memorandum jasasty, dep habarlaidy “Adyrna”.
Vedomstvonyŋ mälımetınşe, Dana Qadyrbek zamanaui nanomaterialdardy qoldana otyryp, atmosfera su jinaityn qūrylǧy oilap tapqan. Būl qondyrǧy elektr jelısıne qosylmai-aq auadaǧy ylǧaldy tiımdı sıŋırıp, kondensasiialauǧa mümkındık beredı.
Kezdesu qorytyndysy boiynşa Su resurstary jäne irrigasiia ministrlıgı men Dana Qadyrbek qūrylǧynyŋ jūmysyn bırlesıp taldaudy, jobany pilottyq rejimde ıske asyrudy, aqparat pen derekter almasudy, sondai-aq tehnologiiany keŋınen qoldanu mümkındıgın zertteudı közdeitın memorandumǧa qol qoidy.
Nūrjan Nūrjıgıtov Su resurstary jäne irrigasiia ministrlıgınıŋ Ǧylym jäne innovasiialyq tehnologiialar departamentıne būl äzırlemenı pilottyq rejimde engızu boiynşa barynşa qoldau körsetudı tapsyrdy. Sondai-aq vedomstvo basşysy joba avtoryna alǧys hat pen baǧaly syilyq tabys ettı.
"Daryndy jastardyŋ su ünemdeu mäselelerıne beijai qaramai, bıregei ǧylymi jobalar äzırlep, jüzege asyryp jürgenı quantady. Bız būl jobany būrynnan baqylap kelemız. Ol su resurstaryn ünemdeude erekşe şeşım ūsynady, būl äsırese şalǧai aimaqtar üşın maŋyzdy. Qūrylǧynyŋ ylǧal az kezde de atmosferadan su jinai aluy onyŋ praktikalyq qoldanyluyn keŋeitedı. Qazırgı zamanaui nanomaterialdar men kün energiiasyn qoldanu būl jobany «jasyl» innovasiialardyŋ maŋyzdy jobasyna ainaldyrady", – dedı Su resurstary jäne irrigasiia ministrı Nūrjan Nūrjıgıtov.
Aita ketu kerek, ǧylymi joba halyqaralyq jäne respublikalyq deŋgeidegı bırneşe konkursta joǧary baǧa alǧan.
Atap aitqanda, Oŋtüstık Koreiada ötken WICO halyqaralyq körmesınde 36 el men 2000-nan astam qatysuşy arasynan I oryndy, İndoneziiadaǧy Jastardyŋ halyqaralyq ǧylymi järmeŋkesınde (YISF) 24 el arasynan I oryndy ielendı.
Sondai-aq QazŪU halyqaralyq konferensiiasynda jäne Kazakhstan Smart Space ǧaryştyq tehnologiialar baiqauynda marapattarǧa ie boldy.
Dana Qadyrbektıŋ jobasy Bırıkken Ūlttar Ūiymynyŋ Önerkäsıptı damytu ūiymymen (UNIDO) bırlesıp jüzege asyrylatyn «jasyl» startaptardy qoldau jönındegı Global Cleantech Innovation Programme (GCIP) halyqaralyq baǧdarlamasynyŋ on jartylai finalisınıŋ qataryna endı.
"Joba Qazaqstan boiynşa 500-den astam ötınıştıŋ ışınen ırıktelıp alynǧan. Bügıngı kezdesu öte jaqsy äser qaldyrdy. Su resurstary jäne irrigasiia ministrlıgınıŋ jas ǧalymdarǧa belsendı qoldau körsetıp jatqany erekşe quantady. Mūndai qoldau menıŋ ǧylymi jūmysymdy ärı qarai jalǧastyruyma ülken motivasiia beredı. Ministrdıŋ bügın bergen tapsyrmasynyŋ arqasynda bız qūrylǧyny dalalyq jaǧdaida synap köruge jäne jobany pilottyq rejimde ıske asyruǧa mümkındık alamyz", – dedı Dana Qadyrbek.
