جەر بەتىندەگى كليمات سەكىلدى ساياسي مەتەورولوگيا دا ۇنەمى وزگەرىپ وتىرادى. الەمدەگى ءتۇرلى ەكونوميكالىق-ساياسي سانكتسيالار، اسكەري قارۋلى كۇشتەر، ديپلوماتيا مەن باق-تىڭ ءسوز بوستاندىعىنا كەدەرگى كەلتىرەتىن ارەكەتتەر قوعامدا ورىن الۋى بۇگىندە تاڭ قالارلىق ەمەس. وسىنداي كەزەڭدەردە جۋرناليستيكانىڭ ءرولى قانداي؟
بۇل سۇراق ەۋرازيا مەديا فورۋمىندا تالقىلانادى. جيىنعا قاتىساتىن سپيكەرلەر: قازاقستان رەسپۋبليكاسىنىڭ سىرتقى ىستەر ءمينيسترى كايرات ابدراحمانوۆ، يتاليانىڭ ەكس پرەمەر-ءمينيسترى ماتتەو رەنتسي، بۇۇ-نىڭ جەنەۆاداعى ءبولىمىنىڭ مەڭگەرۋشىسى داۆيد چيكۆايدزە، اقش-تىڭ (2011-2014) قىتايداعى ەلشىسى گەري لوك.
سەسسيا مودەراتورى «پۋليتتسەر» سىيلىعىنىڭ يەگەرى، «نيۋ-يورك تايمس» گازەتىنىڭ كولۋمنيستى نيكولاس كريستوف بولادى.
سونىمەن قاتار، باق بولعان جەردە سارى باسىلىمدار مەن بۇرمالانعان جاڭالىقتار، ارانداتۋشىلار مەن جالعان اقپاراتتاردىڭ بولۋى قالىپتى. ءارى جالعان اقپاراتتى قولدان جاسايتىن مۇددەلى توپتاردىڭ دا بار ەكەنىن ەسكەرۋ قاجەت. اقپاراتتىق تەحنولوگيا دامىعان زاماندا فەيك-جاڭالىقتار جاساۋ، ونى الەۋمەتتىك جەلىلەر ارقىلى تاراتۋ ءتىپتى وڭاي. وسىنداي ارەكەتتەردىڭ قوعامعا كەرى اسەرىن تيگىزەتىنى بەلگىلى. الدىن الۋ جولدارى قانداي؟ بۇل تۋرالى ەقىۇ-نىڭ باق بوستاندىعى جونىندەگى وكىلى ارلەم دەزير، «New Day Strategy» كومپانياسىنىڭ باسشىسى، ساياسي ستراتەگ رودجەر فيسك، جۋرناليست، ساياساتكەر، قۇقىق قورعاۋشى اندرەي بۋزاروۆ، Zaborona.com جوباسىنىڭ نەگىزىن قالاۋشى، تەلەجۋرناليست كاتەرينا سەرگاتسكوۆا، «Hashtag our stories» نەگىزىن قالاۋشى يۋسۋف ومار سىندى ساياساتكەرلەر مەن جۋرناليستەر ءسوز قوزعايتىن بولادى.
قازىرگى تاڭدا ەۋروپالىق وداق ەۋروپالىق تۇراقتىلىق پەن وركەندەۋدىڭ ىرگەتاسى بولىپ سانالادى. الايدا، سوڭعى جىلدارداعى ساياسي قيىندىقتار مەن الەمدىك وقيعالار ەۋرووداقتى اينالىپ وتپەگەنى راس. وسىنداي قيىنشىلىقتاردا ەۋرووداقتىڭ اتقارار ءرولى قانداي؟ بولاشاعى مەن مۇمكىندىگى قانداي؟ بۇل پروبلەمالار مەديانارىقتا قالاي تالقىلانىپ جاتىر؟ وسى تاقىرىپ توڭىرەگىندە وي بولىسەر سپيكەرلەر قاتارىندا ۇلىبريتانيانىڭ سىرتقى ىستەر مينيسترلىگىنىڭ ءباسپاسوز حاتشىسى سايمون ماكگي، يتاليا پارلامەنتىنىڭ مۇشەسى، ساياسي قايراتكەر جۋرناليست دەبورا بەرگاميني جانە تاعى باسقا ايتۋلى الەم ساياساتكەرلەرى بار. شارا مودەراتورى: جازۋشى، تەلەجۇرگىزۋشى، BBC Europe ارناسىنىڭ رەداكتورى گەۆين حيۋيتت.
وسى جانە وزگە دە وزەكتى تاقىرىپتار فورۋمنىڭ ەكىنشى كۇنىندە تالقىلانادى.
فورۋم ۇستىمىزدەگى جىلدىڭ 22-24 مامىر كۇندەرى الماتى قالاسىنداعى The Ritz Carlton وتەلىندە وتەدى.
XV ەۋرازيالىق مەديا فورۋمعا تىركەلۋ 18-مامىرعا دەيىن جالعاسادى. تىركەۋ ءۇشىن http://eamedia.org/ru/ سىلتەمەسىنە وتۋگە بولادى. ورىن ساناۋلى.
جالپى، ءۇش كۇندى قامتيتىن شاراعا 500-دەن استام وتاندىق جانە الەمدىك تانىمال سپيكەرلەر، ساياساتتانۋشىلار مەن قوعام قايراتكەرلەرى قاتىسىپ، مەديا سالاسىنىڭ وزەكتى ماسەلەلەرى قوزعالادى.
